ডাৱৰবোৰ বিদ্ৰোহী হৈ উঠিছে
দীপালী বৰুৱা
উত্তৰ লক্ষীমপুৰ
আজি ডাৱৰবোৰ বিদ্ৰোহী হৈ ঢাকি ধৰিছে সূৰ্যটোক
ঠিক তেনেদৰে
যিদৰে গণ বিপ্লৱে চানি ধৰে দেশৰ আকাশ ।
বিপ্লৱৰ ভয়ত যিদৰে পলায় চৰকাৰী মানুহ
যিদৰে পলায় কাৰখানাৰ মালিক
ঠিক সেইদৰে
আকাশৰ পৰা ভয়ত নামি আহিছে ঠাণ্ডাবোৰ
হয়তো নামি আহিব বৰষুণো !
বিপ্লৱে চুই যোৱাৰ দৰে
চুই যাব আপোনাক, মোক, সকলোকে।
বুকুৰ একোণত গোমোঠা মাৰি ৰৈ যাব
শৈশৱ যৌৱনৰ বিসংগতি পূৰ্ণ বাক স্পন্দনৰ স্ফুলিংগবোৰ
টোপনিবোৰ ৰাতিলৈ ৰৈ থাকিব যদিও
ভগা সপোনবোৰে বগুৱাবাই আহি আমনি কৰি থাকিব ওৰেটো নিশা
সমান্তৰালভাৱে আশংকাবোৰেও !
Doksiri দকচিৰি, মাৰ্চ, ২০২৫
No comments:
Post a Comment