সম্পাদকীয়

 RÉNGAM BÉDANG

    Réngam ara:lo turra du:né tani kisapé ngolu réngamém mépagla atérong turra:mang. Émpigela aí turying légangé réngamém mépagla atérong turpé mé:né tani:é su:g anu adíso aipé lendung. Ané Abu:ém kangkinkuma:pé ia:bomdung. Aso:pé mé:mila ka:yemílo su:k anu technology mo:pílok inam Reels, Video, sinemang atí atí:ém ka:la anu sí:rum ope:é aro turyi:dé okodéisong méngkinma:pé idung. Alaglo mobile-dém pa:mílo donam tí:nam okkomsinéi lagimang. Longé lo:bu:do mobile-dém ka:la: du:la:dag. mobile-dém pa:mílo ané-abbomsin mitpansu:la du:ladag su:g anu adísok ao-ommangé. Édé su:k anu adílok aro moimangé. 

   Aíké légango atékpé tarungém ru:su:pé mé:la ake ané-abu:é siyum siro tolo-bolo:pé ao ommangém mégolíktokumang. Édémpé ikolo Ajon-arunlok ayang abo:ésin katokumang. Tani:lok mé:po-mé:dír, ankinsunam mé:dug atílok arré su: ajjokosiné katokumang. Sabi edlígla duggomonam putolangémpé ipagdung tani réngamsé. Mé:miru:pénam léga:dé sémpé idung - su: sinemang, siriye:lém ka:la turpé mé:dunéi, turna:n aro do:yingkídí:sém ka:la sinemang moné ope:é sinemang atíém modunéi ? Édé mé:miru:pénampé idung.

   Leke:kémpé do:lu:lo o:kai ngasotko a:daggom su: tani:é gíkumsula ngasod ngasarsubonam tarungko ru:bonamém ka:pa:tokumang. Kapilané su: appíngéi aíké agerlo aipé mo:ma:pé ila: du:dag. Tani:é mitpansudungku - atéro turpé mé:nédé tani:mang, bí taoré manggom uyuépag.

  Léko tétténgko pa:nam sé turyi:sém ai kampopé turpé mé:mílo ngolu aíké légang éddíko mé:sudoji, odokkídíko réngam léga:pésin mé:pa:ye. Akon asakké légang mé:pa:ye. Anu sí:rum ope:ké légang mé:pa:ye. Bojerungko aí légang mé:sunamdé réngamlok aiya:pagma:n takodé. Ngok gernam agerí:dém akon asagé ka:yir-geryirsuye émna mé:jisula ngolu a:péné anu sí:rum léga:pé ainé bédangko siglenbipé lagiye. Édé bédangídé opín béda:pé iye, édé bédangídé réngam béda:pé iye. Dépila ngolu appíng agerém ka:mi-tadmila ager atungém gerpénampé idag.

Tapan Lal 

Doksiri দকচিৰি, মাৰ্চ, ২০২৫