সম্পাদকীয়

 

Nébíngké Lupénam সম্পাদকীয়

AI Mo:pí (AI পৃথিৱী)

   Ngolu tani: kisa:pé Mo:píso kapé turra du:pénaméji édém mo:písok mo:lungém ka:mila mé:miyemílo turnané bédangko po:pé mé:lensula:dungai. Su: mo:pí mo:lu:lo ésíng élíng kakuma:la mo:ípsok moima:séi angupakkang. Tani:é mirém rémlí:la ísíng atíém tékkuddung. Migomésin aísua:pé mo:písok mirémné mimongko émna léngkansunam légangé mo:lungém kampo té:té:pé yapu:la indastrio:pé mongabdung. Ma: murkong légangé tani:é mitpansudungku ésíng-ílíngém okolo lagidang, indastri atíém okolo lagidang ? 

    Édílai turra du:nam agom do:yingém o:rí:pé mé:mila ka:yemílo ka:pa:dung - réngam ara:lo du:né a:ng kané tani: kisapé okkom gerpénammén, émpige:l okkom gerra: du:n ? Su:k anu adíso ajjokosinéi amiké légangé mé:minaé ayiré katokuma:bong. Édé agomdé éddíkoi arro:son ngo:dan kinmang. Su:sin aro a:ng géné aro tani:é dung, du:tí:ye. Émpige:l édé aro: tani: kídí:démsin su:k anu technology-lok AI (Artificial Intelligence) mo:písé okolailokkém lokolailo:pé soyudbomdung. Léga:dé murkongéisong, asin méngkíéisong lula:ma:pé idung.

    Arodém lupémílo po:pé tani:ém mo:lungé o:rí:pé mé:mina:n bédangko bidungai. Su:k anu adíso édémbulum ka:mi-mé:minané ayiré katokumang. Sé anu mo:písé tani adín-i: katéma:né mo:pípé ipakkang. Andéngo:pé lumílo mesin mo:pí manggom AI (Artificial Intelligence) mo:pípé ipakkang.

   AI-é mo:píséméi yedluppakto. Su:pak kinam-ramnam, ngasod atíébulu a:daggom kinné-pa:né manggom abíné angkin kané tani:ém tausutomuma:bong. AI-émpak tausudag. Odokké AI-lok lukéngídém arro: émna mé:robdung su:k anu sí:rum ope:é. Sé AI adísé ayang kané tani réngamképé airupé pésopénam adíko émna lupé ido. Ansu-ka:sula ager tarungém germa:mílo AI-é tani: opínséméi moyudlígye. AI-é no ngoluk mé:píla:ma:nam agerém gaerra:dag.

     Su:pak taupénamdé sémpé - Okko:n édé AI (Artificial Intelligence)-dé ? Kajé ngolu kinkílai AI dé okkoji. AI dok luké:dé andéngo:pé sémpé - Tani:lok mé:ji:nam manggom méngkínamdém ‘Computer software machine’-ki tani: méngkamardémpé arokisa:pé mé:né ‘technology’-ko. AI-é tani:lok pinnyoki mé:lennam mé:lodardémpé mesinki ka:yirsula agerém gerdag. Lékor annyiauko korbad lukapé gímílo tani:lok mé:ji:namémsin AI-é mé:lenjoya:dag.

    “Google”-lo AI lukanpé Chatgpt, Gork-3, Google AI studio, Gemini atí atí AI technology-lo taunamko taumíloi odok luladdém lígémpé pa:dag. Aro:dém lukapé gímílo o:kai kinnam léga:pé su Poyirné kéra:lo:péi gípénam légang katokuma:bo:. Agom ako lukanpé aipéi annyi:sukandag - AI-ém “Ngo kapila lo:bagdang, kapila dola tí:lango du:lí:dang, ngo ainé tani:pé badla:ye:n édémpiné aré kama:né taunamko taugomsin aipé aré kadopé AI-é luladém lubidag. 

   AI-lokké inala:namlok annyiko arré kadung ako ainéko, akondé aima:néko. Ainédé - Poriné ommangé okum arangído tedla dunggela ainé ainé kin-go angkin pa:langgela:sin ngolukké ainé mé:loddém bojeyangko aidopé mé:na:né ainé bédangém lengkanbidag.

  AI-lok aima:né lugé:dé - nom édíloi amme nésu-pasu:né AI-ki mokelebye:song no kinpísula:ma:ye. Nok gomugém, nok ilod-gílod appíngém AI lígémpé ka:yirsula: nokkémaroiné arama:né nom gésuné moimangko jiglenla:dag. Dépila social media lottalo ansu-ka:sula agerém gerpénampé idag.

   Mo:píso dekkoi anu anu ‘technology’ lendaggom aro tani:lok aro ayangém AI-ki rotpagbomla:mang. Dépila tani:é tani:kisa:pé akoné asagém aya:mínsutí:la du:paye. Kapilané mo:písé édílo:pé du:yeji odolo:pé tani:é ‘technology mechine’-ki ager tarungém gerdaggom mesinémyang tani:é tani:íngém mé:tinsuya:ye.

Tapan Lal

Nébíng, Doksiri দকচিৰি 

Doksiri দকচিৰি, মে, ২০২৫