সৰ্বহাৰা জনতাৰ চোতালত
নৱ কাশ্যপ
পালতৰা নাৱেৰে ৰান্ধনী বেলিৰ
আছঁল টানি
সপোনবোৰ হেৰাই যাব ধৰিছে
ৰঙানদীৰ ৰূপালী পানীত
বলুকাত পৰি ৰল সপোনৰ অৱশেষ
চাকনৈয়াৰ হেৰাল মোৰ জীৱন গীতৰ কলি
চাপৰিৰ সিমূৰে বজা
বাঁহীৰ সুৰবোৰ গধুৰ হৈ গ’ল
সেমেকা বতাহৰ পৰশ লাগি
বাৰিষাৰ বাঢ়নী পানীয়ে
মৃত্যুৰ মৃদং বজোৱা ঠাই বোৰত এতিয়া
বৰভোজৰ কিৰিলি
য'ত নিঃশব্দে উচুপে দুই বাই -ভনী চুইটি-ৰুমাই
দুগ্ধ বৰণীয়া বালিৰ মাজত
নিজৰ হেৰুৱা মাতৃক বিচাৰি
ক'ত যে উচুপনি…
এতিয়া প্ৰতিবাদৰ ধ্বনিৰে অকাশ কপোঁৱা শব্দবোৰ
এদিন এনেকৈয়ে বতাহত মিলি যাৱ
বাৰিষা আকৌ আহিব
আকৌ ভাঙিব পাৰ
আকৌ কৰিম প্ৰতিবাদ
হাতত সাহায্যৰ টোপোলা লৈ
সৰ্বহাৰা জনতাৰ চোতালত।
Doksiri দকচিৰি, জুলাই, ২০২৫
No comments:
Post a Comment