সম্পাদকীয়

 

Among (মাটি)

Turra du:na:pé ngolum éddíko donam tí:nam atta:rém lagidagji édémya:pésin ngolukké lagiya:nam atta:rdé ngolukké du:ra:suko sé amo: mo:disé. Ansi-rékí-pé dungko ngolukké ukum mogéngko amo:déma:mílo ngolukké atekpé tani:ko émna kangkinko kama:ye. Ngolu dekkoi mirém rémla: ai kampo:pé du:daggom aíké émna lusupé among ba:ri-ko kama:mílo ami:ésin bérka:la ka:mang. Murkong mirémdé lo:tu mirémé, Amo: mirémdé turying mirémé. Tani opínlok ao:ko émna siksupémílo lékor korra:suko amongko kapérung lagiye. Tani: opínlokké lagiyangarponam atta:rdéi amo:dé. 

     Among légangé mimagé, among légangé rajnitié, among légangé anka:mínsunamé. Amo: léga:péi sé mo:písok pamín ge:míné. Éra:lokké mo:pí-mo:rumlopé among légang pamínsunamém ngolu ka:padung. Ukum érangé érang rísu léga:pé pamíné, Aríg rígné aríg ríson légangé, akonké mo:rumé akonlok mo:rum among rísuém rotkaminsunam silopé yogmang. Mola:ma:dopé annam mo:rumé kapé kínggíné mo:rum migomé angu mo:rumlok amongém rotpé rotpagdagji édémí:pé opan-ki:panné aríg rígnok aríg amongém rotpakpé mé:dag manggom yatkeleblíggel ostangopé répagla tani mokeleblígnammém ngolu ka:pa:tíl dung. Amo: léga:pé déddíné ngasod ga:néko ka:pa:sugelamsin ngolu aíké amo: léga:pé ansu-kinsuma:namdé airupé aima:né agomé.

   Su:pag appíngéi Ohom mimo:so ka:pa:la dung - ngolukké mo:pín amongém kapé ami opíné rotpagbomdu:ji. Du:téng amo:déméi rotkugmílo ngolukké okodéi du:yen. Among kama:n opínlok oko aré:ésin kamang. Among kama:pé dekkoi Agom léga:pé, Dírbí léga:pé; Opín léga:pé mimagém motom oko aré:ésin kamang. Mimag modogom mogodarya:pénam mimagdé Among mimagdé. Silolo:pé ngoluk Ohom mimong tanié among arrém kinsumangga:lok amiém rotpakkosupénampé idung. Kinsuya: kinsuma:péya amongém angu opíné rodnamém ka:la silo Ohom migomé angu opinlok ukum ba:riém nurpagla Ohom amo:lo onam mo:pín amongém la:lenbinam tarungé ru:dung. Migomé aro asinki sé Mo:pín tani du:téng amo:lokkém angu opín taniém nurpagnam taru:sé aroru:péi ainé tarungé. Édém takamei toligdag. No ngolusin tolígdag kapila:né, taye:té lula: gíkampé among kama:mílo rajnitilokkésin aré kama:ye. Luka:pé gímílo aíké amongém rodgapsu:l du:nam léga:pé sé migomsém takam opín réngamé tolíktag. Émdaggom amo: léga:pé ngolukké atékpé gersupénam ageré dekko dung. Lomdanna ayon, runggolo dungkampé aíké aminlok among potta, miyadi atí atíém mosula: méma:mílo a:péné longékídí:do kinsugelasin amiém amongém bipakpénampé iye. Migomé la:lenbinam Mission Basundhara kídí:dé ayonlok dungkampé lomdanla aíké ukum ba:ri, among aríg atíém aí aíké aminlo jiglíksugormílo ro yampopé ngasolokké ngasarsula:yepé.

  Kajé takamé aíké dungko amo:sém mosisupola:je, odokképag mola:pé Agom Mimakko, Dírbí miakko. 

Sa: Édébo:

Topon Lal

Nébíng, Doksiri দকচিৰি 

Doksiri দকচিৰি, আগষ্ট, ২০২৫