সম্পাদকীয়

 

Turgo Bédang Siglenbiné Poyirné odokké Poyirné Longé

    Tani: kisapé aíé kínggí:sula tursunané a:ngko, Kinma:n ko:kangém kinla:dopé bulukké alod, mé:lod odokké turyi:lo:pé ainé turgo bédangko siglenbiné Poyirnéké sé: mo:píso kíla: kíngabla:ma:pé bojeko aré:é dung. Poyirné mamggom Írmi kama:né tani:lokké turgodé pu:po jarpomang émna ludo. Kapila:né Írmi ka:mané tani:lokké angkiné kamang odokké angkiné kama:n taniokké asin yaloé kínggí:mang. Turgolok aru Turying Agom do:ying appí:démi ngolu Poyirnélok pa:la:do. Rakuné tani:émsin ainé tani:pé badmolangkuné angkin kin-go kusere:é dung Poryirnélokké. Poyirném ngolu ngarné opíném molenné émna:sin ludo.

    Su:k anu adí:sé aíké légango mé:sula tani réngam léga:pé mé:né katokuma:bong émpigela Poyirné-kídíngé édémpiné agom do:yingém édílosin mé:mang. Dorné anguné kapé aíé dorkaksugela ami:ém ruwad bidagji édémí:pé Poyirnésin tani: opínlok alod, mé:lodém pu:po jarpomonam léga:pé ainé kin-go angkiném bidag.

   Mo:písok takam tani: réngaméi Írmi manggom Poyirné émyemílo asin ara:bokké ru:né pínémé kumkampé kumgésudag. 

  Poyirnélokké la: kin-go arrém o:rí:pé mí:miné kinjinné Bharot mo:rumsok du:pongarné Mo:rung Mirung oi odokké 2nd-pé du:né Mo:rung Mirung Dr. Sarvapalli Radhakrishnan-bí Poyirnélokké éddíko aré:é kaduji édém méngkinné pinyo burné kin-go migangkai. Bí aídésin Poyirné abukai. Tani réngamlok kin-go aré, Poyirnélok aré:ém kinjinné kin-go migang, Pinnyo burné Dr. Sarvapalli Radhakrishnan-bí Poyirsuné-Poyirnélok aré kané agom do:yingém potinlo bojeko adbila gítung. Bík turdo adí: réngam lottalo bojeko aré kané agomém lubila gítung. Tani réngam pu:po jarponam léga:pé mé:né Poyirné, Pinnyo burné Dr. Sarvapalli Radhakrishnan-mé mé:pa:lé Bharot mo:rumso bíkké onané longédém dítag dítaglo 5 September longkí moí:rbomna dung. 

   Poyirsunélok turgo bédagém siglenbiné Poyirné kídíngém longé ager tarungki moí:rla Poyirné Ope:ém kumgésunamdémpéyam ainé ager tarungé sé mo:píso kamang.  

   Ru:né píné-ké lédulo kumgésunam ngolukké Poyirné kídíngém sé Poyirné longésok a:ng asinko seglígdung. 

Doksiri দকচিৰি, ছেপ্তেম্বৰ, ২০২৫