NGOLU JARSA:NÉ NÉSIN NÉYANGÉ

 

NGOLU JARSA:NÉ NÉSIN NÉYANGÉ

Digen Taid 

Dengkam, sulli: amo:lo ngolu

Okum érang ri:síng koktoglo

Tu:pog ge:néké gí:píd amo:lo

Ngolu jarsa:né nésin néyangé. 

So:bo soben, jégné jéktumé 

Donupé nula dokít kíddaggom, 

Akon asagé samkídlígdaggom

Ngolu jarsa:né nésin néyangé. 

Mo:nu mong-ku amo:lo ngolu 

Rígang aríg rísu kamsulo ngolu, 

Dorbum rumyang pongkog-lo:sin

Ngolu jarsa:né nésin néyangé. 

A:né rago kéréng kéré:lo ngolu

Ta:pir amíng kéíg kéíglo ngolu,

Do:lung sí:lung sungken-lo:sin 

Ngolu jarsa:né nésin néyangé. 

Ésar sarra, kémo ji:ji:la oné pédongé 

Ngoluk jarsangém otum la:pémang,

Mírné do:mír ya:riyégom motumla:ma:yé

Ngolu mo:písog jarsa:né nésin néyangé. 

Jir jir émna di:té:tog biyyi:né assé

Mo:ying amongém biyyudlígdaggom

Pu:mung asi sa:la lumbudlígdaggom, 

Ngolu mo:di:lo jarsa:né nésin néyangé.

Doksiri দকচিৰি, অক্টোবৰ, ২০২৫