যিদিনা বিবেকে সাৰ পাব
কল্পনা পেগু
ভৰিখন মোৰ
ভৰিৰ তলৰ মাটিখিনিও মোৰ
অথচ আজি দুভৰি অস্থিৰ
চকুযুৰি আৰু দৃষ্টিও মোৰ
চকুমেলি শুই আছোঁ আমি
জিভাখন মোৰ
কোৱা কথাবোৰো মোৰ
অথচ আজি মুক বধিৰ
উশাহবোৰ মোৰ
বতাহবোৰো মোৰ
বুকুত জুয়ে দহিছে অহৰহ
ঘৰখন মোৰ
চোতালখনো মোৰ
অথচ আজি সকলোবোৰ অচিনাকি
শৰীৰটো মোৰ
ভাবনাবোৰো মোৰ
পদে পদে
অচিনা ভয়ত কম্পমান হৈ আছোঁ আজি
পথাৰখন মোৰ
শস্যখিনিও মোৰ
সকলো বন্ধকত দি
নিজ গৃহতে আজি মই অঘৰী
যিদিনা বিবেকে সাৰ পাব
সেইদিনা সকলোবোৰ মোৰেই হ’ব
আৰু সেইদিনা তয়েই হ’বি
আটাইতকৈ নিঃকিন বাটৰ ভিখাৰী
Doksiri দকচিৰি, নৱেম্বৰ, ২০২৫
No comments:
Post a Comment