ASINANG OMA:NE NO

 ASINANG OMA:NE NO…?

                                               Mg. Biju Kr Taye

                                 Kangkan Do:lung, Jonai

Nokké sí:sang-sí:dugdé,

Ka:yumoné dumsíg migmodé,

Ngom ka:mot sumodung,

Ngom mé:not sumodung.

Nokké koyem-kosemdé.

Gonggi: lo:Lin amírdé.

Ngom Asinang omodung,

Ngom saggé:m gí:modung. 

Aínoi aína no !

Ngom kangkinma:ne,

 Ngom méngkinma:ne ?

Ngokké éddík mé:namsém,

No aipé mé:ma:ne;

Ngom Asinang oma:ne no ?

Kapé sémpé mé:modu:n ngo ?

Okko sémpé imodu:n ngom ?

Ngo mé:dír-pésin mé:dírmang,

Ngo mé:po-pésin mé:pomang.

Aísuampé atéré- atérpé,

Siyangé kérkér-dung silo.

Aínoi aína nok...!

Bau-guni arígdo,

Rígu: mola du:namdéi ?

Bidné abung pígo:dok,

Así írsu:l du:namdéi ?

Ali-a:ye líga:do,

Gumrag lagsa:l so:namdéi ?

Mé:pí: mé:pangkumang,

An-nyé ríksu:l dungkodém.

Ami kin-mang kin-ma:pé,

Ayang bimínsukodém….

Édé geyomné longékídí:dém.

Aínoi aína nok….

Ege: sumko po:yubdo.

Gamig tíla du:namdéi ?

Pogo-kin-golo,

Potin pojon sunamdéi ?

Opín kélung-kéba:lo,

Gíjon tadjon sunamdéi ?

Ma:nyingéya,do:ng amongéya,

Lusu-lumula: kapsu-ri:mula;

Kin-sulangku:l lomgésu:la,

Asubdokké sumrobla;

Asinang jinna dung pérpéraila

Amig miksi: sikuré….

Billa: dung péri-périla..... !

Doksiri দকচিৰি, ডিছেম্বৰ, ২০২৫