ÉDÉBÍ NOUA:NEI SE:KA:NEI

 

ÉDÉBÍ NOUA:NEI SE:KA:NEI

                                                        Digen Taid 

Bomjé do:lung kéra:do ka:síksuko sí:lu:do

Ali: bírdug a:dodo gu:ni: rígu mokodo;

Kombo: meker ma:ri:pé, tatsut tadlutpé

Do:bo kaban bannédé noua:nei se:ka:nei.

Takom ko:ri: ri:dagdo díyu angkir biddagdo 

Amro a:mé mindído so:yung pakkom kapkodo;

Do:nyi kétog ayirdo rongki:youé rongki:dop

Jé:la ni:tom monédé nouínga:nei se:ka:nei.

Asi tékín témíné asin méngkín mé:míné 

So:yung kabnam tadyénéi oinog ni:tom tadyénéi;

Asin okín omíné érang gengkín ge:míné

Kéígénéi taléngénéi ngoué lugapsulamang. 

Lékidlogné asido andé:pé ege gége:la

Songkong gí:tung ríga:do be:tiya:dém bomge:la,

Migom érang nge:lendo amdang lenédé; 

Mé:nam Yakami:ya édégom noua:nei se:ka:nei.

Mímbír ya:meyé gírgíraila gasumko 

Yirse so:sela leke do:ying kílíg kílígla,

Ríang bíroké ríkséng arígdo rígbo donédé; 

Nouínga:nei se:ka:nei ngo kangkinla:tomang.

Okang boksum asumdo du:síksula kangkíto

Amme gíkom gíromla bíkké anínpé gia:la:tomang;

Atérpé ríksulma:la kepsí:nam agomdém lubila:tomang

Anying anyi:la lé:su lé:sula odokké gípaktoku.

Doksiri দকচিৰি, ডিছেম্বৰ, ২০২৫