ARÉ

 

ARÉ

Mg. Prosanto Kumar Pa:yeng

  Kéno:la apinko dobosupé émna Kélíng lang Kamen bínnyi “Kotír” émnam doko kumdang ko:lo gíabosukang. Bínnyé lomkín lommínna mépagna:ma:nam agerko kala okumdokké yu:lenbosutagai. Yílé po:lo lok kíng-gí:pé Do:nyi gukín-gumín namdé bínnyékké nappangém píkag- píragmola torasula:ma:la édé doko kumda:do bagampé duga:la angu angu doko dungkolo dunga:bosukang. Apin bipénédé gílenna Kamenmé tauto “íngkoko doyén ya:ya, adín koya ongoko ?” Édém ka:la Kélíngbí anyi:sula jé:na lukang “Éi ko:nénga Ngom taupo:ma:pé bím kapina taudu:n ?” Ko:nédé lulatsuto “bím taupo:toném kapika:n ya:ya; ngoluk léga:pé appíng tani: takamdéi atél asagé . Mirém kogo:né émpé kamang. Bím pa:potagai dépila bíméi tatpo:tobo:na; yayno ajjaokosin mé:nyi:ma:péka”. Émé dorra dokeretsulígla Kélíngbí jé:tombomkang, “Bíkké donam tí:nam murkongém Ngo:mín bipénédé, dépila Ngommín taupo:péname:n”. “Dépémílo Menejarém luposuge:la Ngok dorma:logéi murkongém katimopébo téí bím domoto ayang anso gabmoge:ma”, ko:né:dé luto. Aropé ko:né:dé lujubna lunamdém tadla Kamenbí kokala ka:la tomi:la dungge:la édé jaurí:dok bík alagdo bomna du:nam gari: sabi:dém Kélíngmé bilatsutoku, “ya:ya, nokké lédulo Ngo:dan du:pí:mínla:ma:yé:bo, mé:nyi:ma:pébongka, angu tani: léduloi Ngokkém pigo: ganggo:sula domíngépébo”. Édém tatpa:sula doko kumda:dok menejardé lukang, “mé:domílo Ngolukéso gari: dugjo:né tani:ko matilangéi dungai; su:pag lokkéboi agerém No gerrob bomna:yépé”. Édém tatpa:sula Kélíngbí ayi:sula íbímge:la asin arangí:do mé:suto tani:lokké murkongo:dé agommang édémyang bojeko do:yingé kadung turdíso.

Diksiri দকচিৰি, ফেব্ৰুৱাৰী, ২০২৬