লৃগাঙৰ বতৰ
প্ৰিয়ংকা পেগু
বৰনৈৰ সিপাৰে ৰাঙলী শিমলুৰ তলত
কোন জংকীয়ে টুঃটক বজায়
পানেইজনীৰ বুকুত ঝংকাৰ তুলে?
সিপাৰৰ জংকীৰ টুঃটকৰ মাতে
ইপাৰৰ পানেইৰ বুকু বাউলী নকৰেনে…!
মৰমৰ জংকী ঐ নবজাবিচোন টুঃটকৰ এই কৰুণ সুৰ...
গুমৰাগৰ ৰাগী লগা ঢোলটিকে বাবিচোন…
এয়া যে লৃগাঙৰ বতৰ।
কাষত কলচি লৈ ঐ-চেং-নাচেংসতে
বৰনৈৰ পাৰলৈ বাট বুলে,
কিজানিবা মতলীয়া ফাগুনে
কঢ়িয়াই প্ৰিয়তমৰ বতৰা !
সৌৱা চোৱা গিনমুৰ ঔচাৰে
বিলাইছে লৃগাং অহাৰ বতৰা।
টুপ্ টুপ মুকুতাৰ মণিৰে সৈতে
কিমান যে হুমুনিয়াহ সৰিছে নিৰৱে...
মৰমৰ জংকী ঐ
গুমৰাগৰ ৰাগী লগা ঢোলটিকে বাবিচোন এয়া যে লৃগাঙৰ বতৰ।।
Doksiri দকচিৰি, জানুৱাৰী, ২০২৬
No comments:
Post a Comment