সম্পাদকীয়

 

Yanyo í:rdí Pakuang (ৰঙৰ উৎসৱ ফাকুৱা)

  Bharot mo:rumsok Hindu Yelamlok tani:kídíngé age:lokkébo moí:rbomla du:nam í:rdíkídí:dok Yanyo í:rdí Pakua:sé ako. Pakua:dém ngolu Pholgu í:rdí, Doul í:rdí, Holi, Phagua, Phaku manggom Modon í:rdí émna:sin ludo. Bharot mo:rumsok bangkí bangkí mimo:lo yanyo í:rdísém Holi émna ludogom ngoluk Ohom mimo:so abaya:pé Pakuang írdí manggom doul í:rdí émna luya:dag. Hindu Yelamlok tani: ope:é Ginmur po:lolok kartang longélo í:r pongkírpé Yannyo í:rdí Pakuangém moí:rdag. Ali bírdug a:yemílo mo:lu:sé kapé lí:jig lí:jila ka:po kangandagji édémí:pé tani asin ara:losin mé:po yanyo:é i:jig i:jigla a:ng asiném mé:po ménganmodag. Lí:né-gené, yasiné-yakané yanyo kisa:pé tani asinlosin mí:po-mí:dírébulu du:daggom mí:dírkídí:dém mé:ma:pé mé:po ménganla í:r pongkírpé yanyo í:rdé pakua:lo akoné akoném yanyo:ém yonlíkka:mínsula yanyo í:rdíém moí:rdag.

   Yanyo í:rdísém édílokké kapila moí:rdag émna ngolu akoné akoném taumílo sémpé lula:do - Hindu yelamlok kumgésunam Ru:né píné Srikrishno manggom Binshnu-mé kétinsula pakuang í:rdí:ém moí:rdag. Ru:né Srikrishno lila:lo  ngolu yanyo yonlíkka:mínsunammém ka:begdag. Brindabonlo Srikrishno-bí Radha-ké lédulo odokké gupikídardok lédulo yanyo yonlíkka:mínsula í:r poongkírpé anse: seboka:mínsudag. Srikrishnomé kétinsula manggom bím mí:pa:la ngolu yanyo í:rdí pakua: manggom doul í:rdíém moí:rdo. Yanyo í:rdísém Srikrishnoké la: Radha-ké ayang agod émnasin ngolu lula:do. Doul í:rdílo Krishnoké la: Radhaké aro ayang agomé bojeko katé:dung. Krishnomé la: Radhamé ngolu aro aya:lok agodé émna kétinsudo dépila pakuang í:rdísém ayang í:rdí émnasin ludo. 

    Doul í:rdídok lukéngé sémpé kadung - Doul dé isor Krishnoké tetgéngé. Ginmur po:lo:lok kartang yumédo krishno mé doul do tedmogela Angkum ni:tom mola mé:po ménganki moí:rnamdém ngolu doul í:rdí émdo. Odokké isor Krishno mé kumka:pé gangí:dopé gínamdém doul jattrang émdo.

  Ngolukké takam tani:lokké moí:rbomna du:nam í:rdíkídí:lokké leke do:pín do:yingé bojeko du:dag. Ohomso sé yanyo í:rdí doul í:rdísémsin moí:rnamlokké lukéngé sémpé kadung. Ohom mimo:so Mahapurush Srimanta Sankardev-bí turtag 21 do doul í:rdí:ém molenpongka. Odok lédupé daktok ohomlok Borpeta Mo:domlo Mathuram Das Burha Ata-bí doul í:rdí moírnam ager tarungém irobbomka. Édé molen ilen dokké leke: ilod gílodki su:lo:pé doul í:rdí moírnam ager tarungém itíbomna dung. 

   Doul í:rdí agom ara:lo Barpeta doul ír:dí moí:rnam agomém luté:ma:mílo o:kai du:pagdagnémpé idag kapilané émyemílo yanyo í:rdílok aro a:ng mé:ríng ankinsunamém Barpeta doul í:rdílopag ka:begadg.

  Ngolu appíngéi kindag Pakuang émyemílo Hotro Lu:jar Barpeta tani:é mé:po ménganki asin arang ara:bo í:r pongkírla ko:ka:lokké miné-míjínglo:pé pakso: so:la du:dag. Doul dém aíké agomlok bulu deul émnasin ludag. Pakuang a:yemílo Barpeta mo:dumlo lí:né gené yanyo: la: Holi ni:tom-é do:mír ésarlo sargo:la du:dag.

     Ginmur po:lo:lok kartanglo doul í:rdí a:yemílo longé angngo:kopé moírnam ager tarungém idag. Édém ngolu ya:me doul (ডেকা দৌল) émdo. Odokké Gallíng po:lo:lok kartang (চ'ত মাহৰ পূৰ্ণিমা) lo a:yemílo longé aumkopé moí:rnam ager tarungém idag édém ngolu míjíng doul (বুঢ়া দৌল) émna ludo.

    A:poné longédém gundo jattra (গোন্ধ যাত্ৰা), annyiné longédém bor doul (ভৰ দৌল) dokké aumné longé dém (সুৱেৰি অৰ্থাৎ ফাকুৱা) pakuang émna ludo. Pakuang agom dém aba: ba:nyi agomoulok adamlamang. Ara:pé gasum agomé bojeko kadung. 

   Sé arangíso aipé mé:popénam lutatko sémpé kadung - ménnyingké 2025 dítagdo Barpeta mo:dumlokke Bornil Bohonto émnam ope:é Ohom mimo:sok mo:pín agomlok holi ni:tomkídí:dém atsonsugela monam tarungkosin ru:ropka. Odo taru:do ngo aíé daggésula Dhokuakhanalokké gíné mising dírbí ope: lédulo Mising mo:pínlokké holi ni:tomkídí:dém ngolu mising agomki ohom mimo:paksoi mopodanla mising holi ni:tom monam tarungém rungka. Édémpiné tarungkídí:dé pagyangoupé bangkí bangkí mo:pín tani dungko ohomsém léko lakko:pé du:mínsunam a:ngém gémodag.

     Ékédag dékédag Pakua:sé aropakkpéi ngolukké mé:po í:rdíko manggom Ayang í:rdíko. Kapila:né odo longédo ngolu aí:kangkiném mépaggela appíngé lékola pakuangém yonníkka:mínsudo. Sé:koi akoném bojeko pakuang yanyo:ém yonnígdaggom aglí:sa:mapé yirra yirra yonka:mínsu:dag.

  Léddarpé  yanyo í:rdí Pakua:sok lí:né-gené, yasi:né-yakané yanyo:é kapé kangkan ka:yumoudagji édémípé tani: asin kídísé:sin geyom geyomla kangkan ka:yumla, mé:po ménganna, léko lakkola du:téika, tanié tani léga:pé turbokamínsutéika émna mé:lígdung.

Topon Lal