Píang

 Píang

Mg. Prosanto Kumar Pa:yéng

   Kerela:pé ajon lédulo gímín-ge:la atí atíko morésula pa:mínpéya édém mé:la gíné uyu longé akon dokké:bo dungko-dakkolo, gíténg gíté:lo, yubma: ma:yi:lo, dotí: tí:tí:lo bumlíksula    yung-go:la se:koméi lubisupésin ayi:lok lusarsula:ma:la yekang. Kapéi kapéi édé méng-gu ménga:ma:nam longé aum appi:dé gípaknamé do:mírtok pédong okanné kémoné mukka:dé bíkké tukkudokké yí:pak ka:némpé mé:sukang odokké atjaoko ngaosula belamdok ru:yil du:né néyang asumkolo tetrasuto. Do:nyi longédé anínpé píngangardanka:bo. Bu:dorké mé:dír mé:pénam lékoda a:doku. Bík jelapdo noyakosin murkongé émpé kama. Íngkom gínayen,íngkom dona-tí:nayen ? Ajon-arom lok kopésin ayingé mola:toma. Dépila méngkín mé:mínsula du:dak ayirdo bík ajon Jékbolbí "atai du:néi,íngkoko moladu:n", gogdanla ko:ba:do lagbík aledém dasa:la tung-gé:do poksa:la  du:rasukang. Bu:dorbí aíké mé:dír-mé:songém mépakge:la lomuksula ataidokké gísa:namdém anpa:la dé:lenla lukang “ai bagémpé kapé lenka:n atai, Ngom lutadsudanma:pé, kapé ika:neya ?” Ajondé - “ma ma atísinma atai nommíng mé:pa:la:na, pésopénam atíkosin kama ataya. Atainok gípénamdémna aropé gíla:yen gíla:ma:n édémíng tatmínsukol gísa:dunga:n ataya, no mé:séksutonéi ?” “Umm ngo su:pak atainom íngkoko lubisuyebo:n, gípé mé:langéi mosíng-momo sutunga:bo depige:la.... “Kokí-kopakla  Bu:dorbí lutopéya-luma:péya mé:la lunamdém ka:la-tatla ataidé lukang, “ma- murkong léga:pé ataino atí mé:pénam kama, Ngo du:ma:lang, Ngo na gíbosuyen atainom. “Édém tatla bíkké mé:po miksi apir pinyaoko kinsuoma:pé díletkang. Atjaoko lédupé létung ongokolang,sanné boma mirsiko ba:buklígge:la,kampon talapkogom íduplígge:na ti:síkko alo líg-ge:la yumlusula bínnyé atai kumsudé pinkang apinko i:sor dígo líksula ngamdopé dobosuto odokké atí atí do:ying-do:moko kíbosuge:la mé:podanna gípanbosutoku. 

   Amiké amo:lo du:nam-dagnamé dítag angngokope ika:bo. Okum-ríng-ngo, írang ami,do:lung ami, dungko-dakko, yeko-gímanko, aríg, ísíng-ílíng, péyying-péttangém béyak béyakpé mé:pa:langkula Kombong Í:rdído sa:latsulangkula írang ami appíngké léga:pé atí atí génam-bomnam, donam-tí:namém jonga:bomlangkula yirman-luman mínsulangkula, í:rkang.

 Lomla lomla dugla dugla do:lu:lok ajon-arom,do:lung ami ríksunamdéméi atí atíko bila ainam- aimangko taula mukkang kísapé yíng-go:to. Longé yumépé murkong  léga:pé yumma-do:ma:pé ager gerna mogít-igítsunamém mé:títsulangkula aíngké amongí:sé aiya:dag. Do:lung tini ali:do émmumpé, ayir gínamém kinsuma:pé, írangé gogdokugom  jírrí:líksula tas patti kelila,gablíksul du:la írang képégom aimang,aíképégom ainam kamang, gestik nanga:líksunampé idag odokkésin atíkogom molen-ilensuma:namlokki pékogé koga:dag atta émsa:na:ma:dopé, édém méngkinsulangkula ainé agerko gerrobpé mé:la  lékoda tokge:kuma:bo émna ataidém lutélsuto. Anédé luposunamdém tatpa:la mé:poki araipé léko ngasarsuto odokké koyémla épodok ambínlok ammom bapakla dungkang.

Doksiri দকচিৰি, এপ্ৰিল, ২০২৬