বাওনা ঘাট
বিপুল শৰ্মা
ধেমাজি
বাওনা ঘাটৰ শিমলুজোপাত
এজাক কাউৰীৰ চিঞৰ
গড়াটোত বহি
মণিৰাম দাইটিৰ চকু
চেলকণা মাছৰ জলকেলিত
লাইপুলীয়া নৈত
ডুব মাৰি উঠি অহা
আইপানীৰ দেহত মুকুতা
কাউৰী চিঞৰ
চেলকণা মাছৰ জলকেলি
আইপানীৰ দেহৰ মুকুতাত
বুৰ গৈছিল সময়
এতিয়া
লাইপুলীয়া শুকাই গ’ল
বাওনা ঘাটত দলং হ’ল
লাইপুলীয়া শুকাই গ’ল
চেলকণা মাছ নাইকিয়া হ’ল
লাইপুলীয়া শুকাই গ’ল
আইপানী ডুব নমৰা হ’ল
দলঙখনৰ বাবে
শিমলুজোপা কাটি পেলোৱা হ’ল
কাউৰীজাক নহা হ’ল
মণিৰাম দাইটিৰ উদাস চকু
মুখত ভাবলেশহীন হাঁহিত
বাওনা ঘাটৰ প্ৰতিছবি ।
Doksiri দকচিৰি, জুলাই, ২০২৬
No comments:
Post a Comment