RONGNGAMDO PAKKOMA NO

 

RONGNGAMDO PAKKOMA NO

                                           Tuniram Médok

Yorang kídísu rongngamdo mo:té:pé

Kappo:yo pakkoma no.

Nok kapkodo yumínla

Toyal du:né yumma:dé,

Tarongém oryepé kéra:pé

Turnamsok mé:po-mé:díré.

Mo:téngké  do:lu:ngé:lé

Lolad matané kémoné yumédo,

Mé:po pumsuné ayangém

Mé:dír muksubé yingkomyepé.

Nok kapkodo yumínné

Jima:né ayang kídí:dé,

Ngok dungko rongngamné po:yubdém

Mé:dír sagíé pu:bomyepé.

Yuptabla du:né takaré

Mé:dír mamné do:mírto,

Nok tolígdanla kapkodo

Yuppusuné ma:nyi:ngém ma:yepé.

Kappo:yo pakkoma no

Pumsu turnamém yonsuné,

Mébo-bonam ayangém

Lo:tu:pé nértíd bomyepé.

Lékoném ngo gítíla du:lí:dag

Turnamsok gíyarné égodog.

Nok kabnamém tadla

Lambédém mé:nyog mé:la,

Takar appun doksiridém

Lo:tu:pé bíntu: moyepé.

Doksiri দকচিৰি, জুন, ২০২৬