Siyang Boggo Réngama Kinsutoka

 

Siyang Boggo Réngama Kinsutoka 

Bijoy Bori

Siyang a:né boggoso du:né réngama

Nolu kinsudu:yé kinsuma:yé

Siyang a:ném getumla- pé:tumla

Bigdem monamém nolu taddu:yé tatma:yé

Sí:rum sí:rumlokké 

Siyang boggoso sí:sa:né

Abotaniké olung, ope: kídínga 

Noluk sí:sang-gí:sangko mo:léksé

To:dí do:pínpé badpé idung

 Gejig geroné mo:légsé 

Siyang a:néké asi tí:la, a:né pígoso írsula

Sí:sa:né réngama nolu lomna kinsut

Adi, Mising, Galo-é lékopé 

Lendo a:dodoké dungko mo:dísé 

Ya:yo-ta:to, ya:yo-mambuluk 

Yémanko kangkanné mo:dísé 

Migyablo yokpaknané adíé a:dung

Silo nolu méngkinsutoka 

Bharot mo:rum migomé 

Aruna:sol mimong migom tolíkla 

Siyang a:ném getumge:la 

11000 megawat bigdem modung,

Nolu kindoyé kinma:yé 

Siyang a:né kerangké Adi-amongé

Torné amo:ma, sé li:mor sulliyé

Sé amo:sé bottan assém, tarémo:toném torasula:ma

Bottapé pédong omílo, tarmo:ton yunmílo 

Siyang a:ném gétumla 

1000 fit ko outpé monam bigdemdé

Bagémpé bannetyé, assé birrumyé 

Odo ngolu mosí:sunané addíém pa:ma:yé

Siyang a:né boggosok du:né 

Tani: élang ngané takamé siyumpé sipakyé 

Né:ng-ommang, ané-abu 

Sé:komsin sé:komsin ka:sí:la:ma:yé

 Nok angkir bidla monam ukumém

 Lo:pong beddopé gerren-la lé:nam ma:murkongém 

Osa:nam E:go-porog, soí-menjeg, sobeném

Migyablo bidbomyé 

Odo ngolu sidagbo émna:sin lumo:ma:yé

Gíné dítagdo Dikhow a:né biyyi:la 

Sibsagor mo:légém biyyudnamém ka:topéda

Nepal bok  pu:mu assém tattopéda 

Ngolukkoso édémsin dérya:ngo:yé,

 Ngoluk sí:sangko Siyang boggosé 

Abotani:ké ao Adi, Mising, Galo opíné

Mo:písokké yokpagyé 

Adi, Mising lusula dírbí so:man mokosé

Néyin-némíng kangkané mo:léksé 

Migyablo mo:sampé ipakyé 

Siyang boggosok du:né réngama 

Nolu lomna kinsutoka 

Sé mo:léksok du:né réngam takamé lékotoka

Bigdem monam léga:pé migom binam murkongém ka:boyoka 

Nok dungko, yéko, opíné kama:mílo 

No murko:dém okopén 

Siyang boggo réngama nolu kinsutoka.

Doksiri দকচিৰি, অক্টোবৰ, ২০২৬