Tani

 TANI:

                                                                                                                         Néríng-Robindronad Tiyari

           Okomiyalo:pé- Dr. Bhuson sondro pathok

                                    Misi:lo:pé- Bhobo Dole:

     Longékoném ngo tani: mala lento.Boje mo:legém gíkukto.Émpige:la tani: akosin pa:tomang.Édém ka:la ajonkoné lukang-tani: manamdém méto.Éddí longéko mala pa:tomang su:pag pa:ma:bo.

         Kumrí érangdok míjíng Ram prosadbí:sin lukang- tani: manamdé ainé ageré.Émpige:la sé mo:píso okolo tani:ko pa:yen.Ngok gergolok Poromesor babuké lukamdémpé ngo gerpéma:nam agerko gerdung.Bík lukampé gerpéma:nam agerdo ngo adí monyoknammé.Ajjiouko po:pé migom agerlokké gílenkuné Ram loshmon Singsaké lukampé -tani: mago:la du:ma:pé aíé tani:pé inamdé aiya:dag.

 Sek agomémsin ngok asinsé toríksutomang.Bulu se:kosin tautomang -tani: mago:dun kapila.Amidém mépagge:la ngok ajondéi angké:do pigapsula lula:dagai -ngok mago:nam tani:dé bí aídé.Míjíng Poromeswar babu bímanggom Singsa sahabbí aídé tani: émsula:toman?

Ngo mago:tíla du:to.Ngo ayi:sokké do:mír ma:pí:né ukumlo:pé mato.Éddíko tautoji.Ngo tani: ako lagidag.Abayangé ngom yirka:dagai.Akke boliyangkang émna méngkang.Ngok ngasoddé lenyango:kang.Tani: arra:lo dungge:la tani: manamdé aipé ngasoddag. Longékoném omaj Biganiko ríksuto. Bímgom tauto-no tani: ém kangkítang.Aipé tani:ko ríksulí:dung.Émpilai dítag tangngo-takkéngko tani: mala dung.

           Bí ngom lukang.Édé nolukkémang,

Ngolukké mé:pénammé.Malenpé émna mago:dung.Édílo:pé mapama:yeji odopé matípé.Ngok méngkampé toya:pa:yeda.Koyemge:la bí lékoda lukang- kindang appíngngé toya:lai dung tani: léga:pé.

Ngo monba:némpé bíkkolo:pé kokabalala ka:la du:to.

……… …………… ………. X………………..

NB. 2 Augusto 2020 dok SADIN deuboriya dok Manuh (Anu golpo) dok atsonsunamé.