Lígang Miyum
Tuniram Medak
 |
Ginmur po:lo yumdé:do
Po:lo loladém ursula,
Purang namné ésardé
Kinsuma:pé sagí gímodag.
Lígang ésardo yumínla
Gumrag dumdum mannamko
Jemig jemikpé tatto ngo
Ginmur po:lo yumdé:do,
O: ngok, lígang miyum
Yampok longédo gílenlang déi,
No gílen yemílo talé:to
Yinggom mukkangé midangém da:dag.
Yuptabné a:né lé:sin mamo:sudag,
A:nélo ursuné pédo:dégom
Gejigné amliém pidjerdag.
Lé:bang gakebém sarge:la
Gakpuném la: lakpuném
Kepsila mébitag nom.
Mibu galugdok gamig
Ma:nyingém ma:pílton no ?
Gonro ugon, ri:bi gaseng gédanla
Aríg ke:nyungé:lo tagburdanla,
Do:nyi: po:lo, karsing-kartang,
Siné-mobo, ta:to-ya:yobulum
Petomdanla amliém líggottag.
O: ngok, lígang miyum
Yampok longédo gílenlang déi,
Miyum angké:dok pedlenné
Inggango:né otsur ni:tomdém
Lékoda no ngom mobilangku
Du:té:sém lékoda gejig molangku.
No comments:
Post a Comment