LONGÉKO NGASODÉ LONGÉKO MÉ:POÉ

 LONGÉKO NGASODÉ LONGÉKO MÉ:POÉ

Bhaigeswar Pogag

Tamen bí Nékung,Supisumi,Gurban,Takuk,Ríkom,Okan,Ríbo, Sompa kídardém sogondo síngkumlígla dung.Monpurbí taudung-“Ai ataya,rokom rokompé íngkoko sogondo sí:lígdun?”Odo Tamenbí lukutsudung-“Luyobongka ataya,Ao ommang bojela ma murkongéi pí:líksumang.Annyiko lékor Íyíngdo annyiko lékor akkéngdo porila du:la pilen-piyangéi sulamang.Sinnyi guni: arígésin aitomang.”Édémpé lugela sogon annyi:dém ba:rpé rakpansugela Monpurmé lu[posula dung.Yadémbí gílenna milbodém lomna gígela gígorlangkuka émna urrígdung. “Monpura íngkoko ma:la gítogdungan?”Monpurbí lukutsuto-“Ai nénga,angkupéné Do:nyi longéso ngokké abí:né omédokké ju:né gía:yeku.Odok légapé lutatkolo a:dung.” Yadémbí kungkedém tunggé:do tíbígela lukang-“O, aiye , sangkoi tí:potoka,tunggéso:pé gísa:toka.”Tamenbí atai sa tunggéto:pé gísatok émna goksa bomdungku.Do:yi:lok do:yi:pé kíbosula du:dom do:yingé lentíkang.Ataya,ngokké omé annyi:dém poraikolo píkaggédu:bo.Akondé metrigdémgom déngkongéi la:tomang.Amilo dukpakkang.Akondé sinnying metrigbiyebo.Atai no kapé poraidun?”Agomdém tadgela Tamenbí lukang –“Ataya luyobongka,ngokké ommang kídarsi porinamé aidag.Émpigela,ngo porai la:yesong poraila:ma:yeng lupísulamang.Buluké légapé durobdanna arígpé gído.Arí:dog mo:népé gído.Mo:nélok néyang oyingém nabomdoku.Mélo nékung émlang Sompaékké pa:la bomtungku.Sém  ko:pag do:lu:pé olaisukolo lendung.Sékai murkopé bidag.Sé:kai a:m-a:mbínpé bidag.Édémpéna ommang kídarsim poraila du:bon.Ako Bi.E dém pa:stobo odokké ako Injiniyardém pa:sla lé:tung.Sakori magola dung.Alaksi murkongé kamang.Among asiém boejeko kamang.Do:né amo:ng kédardémgom  Gagor abungé sibug raketpé ko:pagbomdung.Ommang kídarsém poraila tani:pé moma:mílo yampo roye ngokké turkoi kamayepé.Annyiko sinnying hayar sekendaridém pa:syebong.Bínnyesin kole:jpé lenmílo aruda ngasod a:yepé.”Agomdém lugela sa:ng tí:bosudung.Yadémbí bulum sa:ng bigela oying étor ara:pé gíyingkang.Bínyi sa:ng tí:bosugela gípanbosukangku.Tamenbí oying ba:rdém jo:bomna Ko:pag do:lupé gíkang.Édémí:pé lo:dípé oyingém mo:népé gíla  magola olaisudag.Longé dola yuméko gabla ommang kídarém poraila dung.Ommang kídardé:gom méngkitsudag.Na:né ba:bubí opané émnamdém kinsudag.Ammem bottapé mansumang.Aya:ngo kandopé akon annyiém luposudag.

     Adíé gítíkang.Tamenké ommang kídardété bottangapka:bo.Abí:né annyi:dok akondé kolej:lok porainépé ikang.,Akondé Bharot migomlok Injiniyarpé ikang.Ame:né annyidok ako Bigyan mastorpé ikang.Akondé pulis migompé ikang.Tamenbí supag ami:ké lottalo gígo gígo oying la:yenéi? Oying la:yenei? émna tadgopé lagikuma:bo.Bí supak ommang kídarké biyangkunam murko:dogéi aríg ima:pégom migom kísapé dola du:la:dag.Émdaggom bí arí ésing inamdém silopé mémang.Ao: ommang takamdém yaméngémsin la:sidbitagbo.

Longékolo Tamenbí étor kídardém petsila dag.Monpurbí bojar gípé émna Tamenké lottadok gípaddo:uwém ríksula jé:yosuto.”Atayé no:dan aikabo.Ommang appídém migom ager magabbila.”Odo Tamenbí lukang-“Ataya, ngo poraidagém murkong mago: mago:la longéko dola odokké yuméko gabbola ommang kídarsém poraito.Bulusin na:né ba:bubí opané émna kensula aipé porito.Édémí:pé bulu anka:ngém bigo bigola aíé sakoriém langapsutag.Sakori légapé ngo abarkosin bipa:tomang.Porinamélang aíké sorittrongé aisumílo tani:lokké sigoé kamang.Télé Donborké ao: kídartém ataya ka:dun?Sité menjégé,Among arígé bojeko kala mirém émna akon annyiém ka:tid ka:malla démgo pago:la yedagai.Abudé ammem kumgo kumgola buluké ajéngém dorra dorkaksula su buluké okkosin ka:tokuma:bo.Ommang kídardok akosin goti kané lentomang.Luyitsula lumang ataya ngokké ommang kídarsi Do:nyi-Po:lo asin gédag.”Monpurbí ataya ngo bojarpé gípopé émna lugela bojarpé gíto.Tamenbí ommang kídarké ainam légapé lo:dí Do:nyi-Po:lomé kumsudungai.