AGOM-DÍRBÍ:ÉLA: MISING RÉNGAM

Dr. Abhijit Pa:yeng       

   Akon anni:é lékona:pag réngamko baddo. Réngamlokké ilod-gílod daglod-yélodko kado. Mising réngam ara:lo:sin dung. Débulum igap-gígab-daggabbomnam léga:pé takamé mé:mipé: lagiye. Do édilo:sinéi réngam ara:lo ngasodé ama:ye émna luna:do.

      Misingé ABO TANI:ké ommangé. Édémí:pé  lendo a:dodokkéboi Misingké agom dírbí alamé kasudung. Su buluk ayyarnam léga:pé mé:pénam adíé a:dung,   dagyarra agerko gerpé idung. Mé:ma gíma: odokké germa:mílo agom dírbísé dungkodoi du:pagyepé. Agomko luna adna, dírbíko kinna ka:na gémílo bommílo:pag akon akonpé du:né réngamé tadkinye  kangkinye. Dépina Mising takamé aíké agom dírbí léga:pé akiyém kipé lagiye. Mé:mipénam do:yingé, akeyé Mising agom luna odokké pona atíkosin pa:na:mang émna adyir poyirsuní:mang. 

   Aíké ané agomém ungkokoi pa:nam léga:pé adyir-luyirsupé lagidag émna ménggodé aroé émna kapésinéi luna:mang. Ané agomdé ané agomrungé. Ungkokoi pa:nam pa:ma:namki luyi sunamdé kapésinéi  ainé do:yimang. Ané agomké nérkíg do:yingém kinné asagé lutung- “Ané agomki:pag a:ng ara:bok du:né nérkíg do:yingém kísarsuna:do. Akon akon agomlok kapésin kísarsuna:mang. Édémí:pé ané agomki:pag ojjíngkoné asut adí: ara:do bojeko do:yingém adyir-poyirsuna:do.”

Ané agom kísapé dírbí:épag réngamko:lok ména:ma:nam akténgko. Dírbíki réngamkoné aíém dagkan-lukansuna:do. Réngamkoné odokké:bo su:lo:pé odokké yampo ko:supésin Mopí:so du:yaryepé émna luna:do. Réngamkolok mirémém dírbí mirémki:pag kína:do. Émnamé réngamké:lang dírbíké mémínsuna:ma:nam do:yingékké kadung. Su Misingké agom dírbí léga:pé bojerungko mopé gípénam ager tarungé kadung. Agom dírbíé ayyarmílo:pag réngamkoné aikampoye. Akon akon réngamé:sin ménggésuye, lugésuye. 

   Mising agomké abígém ENGLISH ALPABET-lok na:sonsunamki Mising abíg kídarém pododo ENGLISH-éla MISING ABÍG ara:lo mé:mur mé:yaré a:na Mising abíg atkai pokai sukodo ngasodé a:dung. Dépina MAK-é Mising abíg ponam alamém ENGLISH ALPABET ponam kísapé popé lagidag émna ru:rop dung. Édémí:pé Mising Dírbí Kébangé Misingké leke dumdum dí:lod so:lod ni:tom goglod kídarém CLASSICAL BASE-pé mogabnamdé ayye émna igab mogab bomdung. Aine do:yingé, émdogom so aíké agom dírbí alamé du:pérung lagiye. Do:pag Mising agom dírbíké lukéngko du:yepé. Mising abígém ENGLISH ALPABET kísapé pomílo odokké dí:lod goglod so:lod atíém CLASSICAL BASE-pé ido:lo:sin kinné pa:néké ara:ngí:lo lupelet-minsunamém kinna: dung. Su MAK-éla:  Mising Dírbí Kebangé aikampopé ru:suna takamké kinna:nam, ngasodé ama:né ainé bédgo bédangko ru:lenmílo aido. MAK-éla: Mising Dírbí Kébangém gígé daggéboné takamé:sin réngamké aipé mé:nam ménggodki mé:mi-sagmi:na ager tarungém gerpé lagiye. Sékkéi lugurki ager tarungém gerpé lagima:ye émna mé:namko kadung. Sékkéiké lugurki monam ageré édílo:sin kabomang odokké akon asak loksin aidag émnamko pa:namang. Pa:daggom édé asut adí légango:pé ido. Agom dírbí bélamém igur gígurboné takamé Mising réngamké a:ng ara:lok do:yingkosin mémi:pé lagiye. Odo:pag  agom dírbíké léga:pé  asinang onamé réngam ara:lo duyaryepé. Takaméi kindag aíké ara:lo mé:jup-mínsunamko kamílo:pag agom dírbíé ayyarra gíye. Aíké ara:ngí:lo lumin ga:mín suna du:mílo amiye lure: ka:reyepé.  

   Ake ake Tani: réngamé aíké agom dírbíém mitpansukunamki makut sukunam do:yingém Lutad, Potin atí atílo popa:dung. Sokké tu:ladné moimangko Mising réngam ara:lo su ka:pa: tadpa:dung. Akon akon dormo:lo asonsuné ake Misingé aíké opín molod-ilod gílod-daglodém mékudsuge:na a:sonsunam dormo:lok molod-ilod gílod-daglodpé dagdung gídung. Lukan kísapé, Mising réngamé Tani:ém siyemílo yudo. Émdogom dormo:lo a:sonsuné ake Misingé siné Tani:ém yuma:pé romdung émna kinna:dung. Édémí:pé ake Misingé aíké gélod-bomlodém géma:-bomma:pé amiké gélod-bomlodém génam-bomnam ka:pa:dung. Sébulu yampo-ko:su Mising réngamlo ngasodko a:moyenémpé andung. Dépina méngkinsuné Mising takamé ka:re tarre:nané agerém gernamdé kapésinéi ainé do:yi:pé ina:mang. 

   Mising takamé unkoloi du:dogom aíké agom dírbí bédgo-bédangém mépélagima:ye.  Kapéné sibulu:pag Misingké kangkin-sunané alamé. Aiké Mising agom dírbíéla gílod-daglodém kinsuma:namdé aipéi mé:dirpénam do:yingé. Adíé se:komsin toya:mang, bíggíngké lédulo aíké agom dírbí ayyarnam léga:pé ager tarungém ru:na réngamém pu:pojarpobopé lagiye. Réngamké ainam léga:pé Mising takamké gerpénam akténgko kadung. Mising takamé réngamké ainnam do:yingko mé:mílo aido.   

                             

     Teaching Associate, Dept. of MIL & LS, Gauhati University

   E-mail: apayeng@gmail.com, Luposuko: +91-9678782792