TOKA:LA DUNG NOKKÉ MIMAGDÉM

                                    Bhaigeswor Pogag

( Oi Appun Surjyo Sinte:mé mé:pala)

Obonori korongé toka:dung

Ansin:né asiko bitkatpé émna,

Mising réngamé toka:la dung

No gílad-yeku émla;

Nokké ma:tu:nam yummadém

Ma:pílbola  nokké réngamsém

Ruwad bédangki gíboru:yeku émna.

Nokké ma:nam yumma:dé 

Do:ng amo:so yumma:pé ,

Longélok lo:tu:pé

Yumélok yumtu:pé

Mukkang ara:do yi:titkang.

Nokké gídíng ponsa bomla

Mimag mobonamdé,

Nokké jé:la kula goglennam

Do:nyi ruwaddé 

Po:lo ruwaddé 

No kakuma:la réngamso 

Silo kémmo ji:jingé .

Nokké korbonam dakordém

Nokké gogbonam ni:tom a:ba:dém

Mising réngamé ka:lí:la

Toka:la dung amig ya:ya:pé.

Nokké mimag dakordém

Du:téng amo:ng mabonamdém

Gídíng ponsa bomla

Mising réngamké ka:pénam

Do:nyi ruwaddém

Po:lo ruwaddém

Ka:boru:yekupé émna

Mé:la dung takamé.

Nokké gognam gomugdé

Nokké tukoksunam dognépé

Tubomsulaye gikan?

Yoksa kíríngdém

Nokké gognam ni:tom kídardé

Silosin turra dung takamké a:pílo

Ara:boksin a:ng ara:bo.