AYANG

Tuniram Medak

Nok amigdo ka:tagai

Apir apirpé oletpé madagai

Turnamsok ayang takaré.

Sinam turnam ma:nyingé

Seyé-sekurla yiradagai,

Lupo sudagai rongngamdo

Édílo:sin kíngab la:ma:nam

Tani: turnamsok ying-go:né ayangém.

Muksubé po:lumnam ngasod kídí:dé

Édílo:sin nom mépag ledmangai

Kénong no:signé ayang asinki

No turnamsiméi pésodagai.

Sargol du:né ayang kídí:dé

Apir apirpé pirgol du:daggom

Nokké asin onam ayang abu:dé

Édílobo pínpakkang.

Émdaggom ayangém kétinsula turpa:ye,

Ayangé kekon kesakoé

Gomyed bomla du:ma:mílo

Yi:ma-yi:ral yinggo:né mukkangémpé

Yinggol du:ye nok turnamdé.

Turdaksoi ayangé du:tíye,

Ayangém mé:tin suma:mílo

Golu:lok miksi sikuré

Turnamsém rotpé rotpagbomyé.