SÍ:SANGÉ KINSUMÍLO:PAG
RÉNGAMÉ AYYARYÉPÉ
Dr. Abhijit Pa:yeng
Silok sí:sangé ro:yampo réngamké jo:pongé. Kapéné, sí:sangé yampo réngamsém gígé-daggé bopéné. Sé luna gínam do:yi:sém kapésinéi topagna:mang dokké Sí:sangé kinsumílo:pak réngamé ayyarye émnamém asutko mé:mi:míloi mé:begdo. Sékké réngamlok sí:sangé kinsuma:yeji dokké réngamdé lédumokutsuye émna luna:do. Globalization-ké adíso sí:sangké lukéngé airu:péi kaya:dung. Sukké adísé lo:yid kísapé longém-longém anguyonna gínamém émpagloi ka:pa:dung. Sok dagrasunam léga:pé sí:sang lang réngamé kinsupérung idung.
Siyum-sí:ro Migomké sí:sangé:la réngam ainam léga:pé sabamna:ma:nam ager tarungé kadung. Sí:sangé ungkuiko mopé mé:mílo mola:yélang émna mé:tumsupénamé:sin kamang. Murkong ngasodé:sin siyum-síro bottané ngasod mang. Sí:sangé Migomké sí:sang lang réngamké ngasodlo ka:dumsunané ainé ager tarungki aikamponé ruwadko léngkanna:do.
Réngam ainam léga:pé Migomké Schemes, Programmes, Projects lang Mission atí-atí ager tarungé émpag departmentloi bí:na dung. Tani: turgolok émpagém luténgge:na:sin okum érang, réngam odokké opín lo:pé aíém aimosunané bojerungko ager alamé lensuna dung. Sokbuluk léga:pé daglenna ager gerpénampé ido.
Sémpin ager tarung du:do:so aíém aimosupé mé:né takamé pa:ní:namdém pa:nam léga:pé jotnogém mopé lagiye, do:sin aimosunama:mílo opan manggom bhagya kompalémpag lutagsuna:do. Silo ngoluké bijerungko alodé kadung. Dé bulum ayyo:pé kinsuna pagla:danye émna mé:ségsunamko kamílo kapéi-kapéi idaggom pa:pé mé:namém pa:na:dopé alamémgom pa:na:do.
Silok sí:sangé aíké turko bélam léga:pé orí:pé mé:pénampé idung. Ake-é ungkolo:pé pí:lí:dagji dém mé:ségsupa:ru:ye. Do pagna:yérung émna a:ngé kínggí:sa:ye. Doíng édílai démbulum mopirra:yélang émna mé:sunamkosin a:dung. Manggom akon-akoném ka:yi:suna édílai mopí:-gípí: na:yenéi émna mé:sodsudung. Sémpiné mé:sodém silo aíérung kama:pé mopé lagiye. Réngamém Anupé rusa:namdo sí:sangké okti (power)-ém émpag adídoi ménggésuna dung. Ungkué adído sí:sangé réngam léga:pé ang dígna gídu:ji dém sí:sang kídarké adíé émna minteg suna:do. Dokké ungkué adído yubdu:ji dé kémolo kéyudsudung.
Silo sí:sang kídarí: sí:sa:ngém réngam léga:pé kinsudopé dokké anéké ésa:né moyimangém lékona léngkanpa:ye. Do:pak sí:sangké oktiyém takamé kinyépé. Réngam lang bík ngasod kídarém kama:pé moge:na ainé bélam lo:pé mé:yarnamdé bulugíngké émna mé:ségsumílo réngamsém anu bédgo-bédangko léngkanna:yepé. Lutégdanna lupé lumílo Education, Health, Sports luté:na réngam turgolo sí:sangé gígéna aipé aimona:do.
Silo do:lung Tani:ké ainam léga:pé bojerungko Scheme-mé kadung émna talé:té luna gítung. Té:bulum sí:sangé do:lung Tani: takamém kangkin suboge:na aikolo:pé gíyar mona:do. Émpíge:na sí:sangé aíérung lékona po:pé gílenpa:ye. Manggom aíké ménggodém aimoyangge:na do:lu: Tani: kídarlo:pé information-ém pímopa:ye. Sémpé réngam léga:pé gernamsé appíngém yang gayya:né ageré. Sokki sí:sangé ayyarru:ye, dokké réngamé, do:lu: Tani:ésin bulum ménggé suye.
Sí:sangé réngam ara:lokké aima:né gígod-daggodé:la apo: potika: tínamém kama:pé monam léga:pé daggésupé lagiye. Apo: potikangém tímo:lo kapé idoji yampo-ko:suk réngamém kinsumonam léga:pé dírbí ager tarungém gerropna:do. Témpé ru:su:dag léddarpé lula:do réngamém aikampopé ru:sa:nam léga:pé sí:sa: takamé porinamém poge:na:sin ainé aimang kosin méngkinpé lagiye. Do:pak poriné, ainé dírbí lang kinné opínko réngamlo ngansa:yepé.
Sí:sangé okum rínggo:ko bomnamé:la réngamlo aíérung turnané kin-go (Education) ki aíké ale:lo dagrasudopé mé:pé ika:bong. Démpé mé:ségsunamdé silok sí:sang kídarlok ainané dokké do:lu Tani: takamém kinsumonam alampé iye. Sí:sang kinsunamém tauno:lo du:téd mo:ma:pé do:lu-do:lu:lo:pésin gíyar mopé lagiye. Do:pak do:lungé lang do:lung réngamé ayyaryepé, Sí:sangé do:lung ainam léga:pé du:né takam ager taru:lo dunggésupé lagiye. Sí:sangé éddíkoi lékona émpagké ainam léga:pé mé:yéji, dédíko do:lung kídaré:gom ayyar tíyé émna mé:na:do.
Teaching Associate (Mising), Dept. of MIL & LS
Gauhati University
E-mail : apayeng@gmail.com
Mobile : +91-9678782792
No comments:
Post a Comment