জীৱন এক নিমিলা অংক

ঝৰ্নালী শৰ্মা বৰকটকী

উন্মনা যৌৱন দুৰ্বাৰ আশা

অলেখ সপোন অলেখ অভিলাষা

সময়ৰ কোবাল সোঁতত

থমকি ৰয় জীৱন ৰথ

পাৰ ভাঙি বৈ আহে

শাওণৰ  ঢল।

আধৰুৱা সপোনবোৰে

হাহাকাৰ কৰি উঠে

সমাধান বিচাৰি

জীৱন  হৈ পৰে

সমিধানবিহীন অংক

শূণ্যৰে পাতনি যি

আৰু শূণ্যতে শেষ

সুখ, দুখ, হাঁহি আৰু কান্দোন

পৰিধি বিহীন বৃত্ত

অলপ হীন দেঢ়িতেই

ৰূপ লয় জটিল্ সমীকৰণলৈ।

জীৱন চক্ৰৱৎ

আগবাঢ়ে বিৰামহীন গতিত

ধৈৰ্য্য আৰু সাহসেই হয়

কঠিন যাত্ৰাৰ পথযাত্ৰী।