প্ৰেমৰ কবিতা
জুনু বুঢ়াগোহাঞি
গুৱাহাটী
কুঠৰীৰ উমাল বেৰত
ওমলি আছিল সৰু পৃথিৱী এখন
ৰ'দৰ হাতৰ পৰশত
গলি থকা সংলাপত
ওফন্দি উঠিল আকলুৱা আৱেগ
নতুনকৈ বলা বতাহ এছাটিত
নুফুলা ফুল এপাহ ফুলিল ৷
একো নোকোৱাকৈ সকলো ক'লে
কুঠৰীৰ চকুৱে
আৰু আঙুলিয়াই দেখুৱালে এটা বাট
কোনোদিন নোযোৱা গোপন বাটেৰে
যোৱাৰ দিনাই
এৰি থৈ আহিলোঁ বিষণ্ণ সুৰ
এৰি থৈ আহিলোঁ নিসংগতা
বান্ধ খালে নতুন দুভৰি ৷
:
প্ৰেমৰ দুখোজ একেলগে এখোজ
:
খামি-ডাঠ খোজটোৰ বিষয়ে কি ক'ম
আজি একো নকওঁ
ক'বলগীয়াখিনি কুঠৰীৰ হাঁহিটোৱে ক'ব ৷
No comments:
Post a Comment