NGASAR

Bhaigeswor Pogag

Ta:tém bí Iskulkolo mastor idag.Ao: ommangé appi:ko. Abíné annyi:dé  milo ko:é. Ame:né annyi:dé mimé ko:néngé.Ta:témbí apong tí:balla ka:píla:ma:nam kinamko a:la sinamé po:lo píkéngko ika:bo.Okum írangé ngasotpé ikang.Ta:témké ao: Monpurbí supak okum érangém ka:si:pénampé ikang.Donirambí ame:la dung. Bírmé annyi:dé:gom ame: du:da. Monpurbé méramdém murrobboma:mílo okum érang takamé aki: bukitsula du:pa:dag.Émpila iskuldok midum takamé migomém lubo abu dok sakoridém Monpurmé compensation pé bimotungku.Supag okum érang takamé bí:mong mé:tínsudag.Bí sarkoripé gíma:mílo buluké okumdok méramdo ummé dormang.Ané Yakasi bí:gom pensam pensamlo kikín kimínko dung.Anédé amikémpé ardasimang.Émdaggom ao: ommangém Do:ny pédongém kangkurmomapé lé:tung. Abu:dé du:dolo asé:ngo:pé ommang kídarém mosing ka:sila dungai. Abudé sinyo:la gíkunamé su ma:ya:pé ngekoriné kísarpé aso:pé du:dag. Popékémpé mé:posin katokumang.Ame:né ommang kídardok légapé mé:pénampé idag. Milbong kakuma:mílo ammesin mé:tid ka:tiddag.Tumbo émna luman lusandag.Bí édémbulum aipé mé:mang.Kadag kamang tupsigém kupsik sula du:la aipé mé:sudag.

Adíé gítíkang.Ommang kídardé:gom silo ya:yang, yampo ya:yang yame: mímbípé idubong.Monpur bí:gom porinam mé:pagla abudok sakoridém pa:dokké alaglo murkong gakpa:la ajon arum léddo:lo yedag.Sékai ludag bí draksém tí:dag dodag émna. Yaksibí luyir kídaksin.Anédok luyirdém tanyi:pé taddag.Ajon arum lédulo yedokké anédém murkongém biyangkumang.Murkongém mopit moidla su okum éra:ngé doko tí:ngkolo ngasoddag.Monpurbí tí:la dola okum érang do:yi:dém mitpansutoku.Bí bhang,apong, draks okkomsinei lé:mang.Tí:bad dodatsula édém bulum tí:ma doma:mílo du:langéi kuma:bo.Sakori mojon kídardé:sin luyir kídag.Tatkinmang.Séko luyiryeji bím lékoda luposukumang.Okumdok attarém kongabla okkosin kakuma:bo. Bíro bírmé kídardé longéko dodag longéko gabdag.Anédé ami: ké éra:lo morésukapé gídag.Abudok sakori mojon kídardém ríksumílo annyingki miksi bérok bérkpé dídag.Asin do:yingém lubisumílo amme ngilpéké émna asin ara:doi pamla léngkolo léko léko ngapinsupé idag.Lékoném Yakasibí mé:dag yaméngkoi la:bimíloi mé:kinéi suye:kuson! Lékomílo mé:dag ami omédém la:bigela ka:si mosi:la la:ma:mílo amme lure: luse:yepé.Édém mé:ngkín mé:mínsula du:té:ngí:dok yuppagdag.Longékolo buluké lottalo morésunné annyi: aumpé du:dagai. Silo ami: lottalo morésukolo gínamdém bí mé:la léko léko mé:pinsudag.Léko léko bí mé:sudag ,sé ru:né pínéké do:sogé émna.

Monpurbí di:utipésin gímang.Longé lo:bu:dém yubla do:ye odokké yumdéng ayirmílloi ajon lédulo rolendag.Ami:ké attarém ponggo rodgola yedag.Kumrí do:rílog lottalo atí attaré do:lamang.Pa:namdéi tí:bomna gídag.Anédé  kumrí do:rílo gílen gíangéisulama:bo annyingki.

Ager okumdok migomdé ainé tani:kai.Opan tani:ém aipé aya:nékkai.Ané odokké bírmé bírodok migmoém ka:la atípésin lumangai.

Longé kolo amiké okum érangkolo pongka:pé gíadolo ménto. Dugla gídolo ga:rié dugjebla duke:to.Bíkké sidokké buluké okum éra:do mukkangé yi:títtonémpé ikang. Anédé tumpakkang.Go:réng go:réngpé gí:gongkang.Migomdé buluké ngasoddém ka:ra:sula:ma:la ame:né omé: Yakadoimé ager okumdo mastar ruldo sakoriko bito.Bíkké agerdok pa:nam murkong dokki okum éradok méramé dordag. Abudok pensondémsin migomdé molen bitoku. Buluké migomdé buluké éradok ru:né pínépé ikang.Yakadoibí anédém ainé daktorlo gíbola léngkanka.Anédém Yakadoi lukang-“Na:na, yogné yokkabo,du:no:sém mosi:la lé:lai.Mé:dír mé:sola du:la okkomsin pa:mang.Tani yenamso longéko ngasodé a:dag.Longékolo mé:posin a:dag. Ngasoddé du:yarmang.Asi da:ré kapé angu angutíla gídagji édémípé tani: yenamsé:gom angu angutíla gídag.”Yakadoiké do:yi:dém tadgela lukang-“Ru:né píné no sémpiné ngasod kané ankangém  lékodag ka:moyokubongka.”Édémpé lugel léko bottapé ngasarsuto.