POYIRNÉ

 

POYIRNÉ (Poyir Abu)

Horish Dole:

    Poyirné manggom Poyir abu émyémílo réngamlok airu:pé ménggésunam midumé. Taniyém tani: kísapé turnané bélamdém léngkanboné kídí:dok ané-abulok léddarpé poyirnékídí:dé du:dag. 

     Inglish agomlo lunamko kadung, "Teaching is the one profession that creates all other professions."

     Lumílo Poyir abubí édémpé idag, bí aíké kinnam pía:dokki appíngké turnamém pía:modag odokké appíngém ainé bélamém léngkandag. 

     Horbopolli Radha Krishnobí Poyir abuém airu:pé aipé mé:dagai. Émpila bi aíém Rastropoti émna lukansunamdémya:m Poyir abu émna:pag lukansulí:dagi. Bí poyir abu tayé:lo agomko sémpé lutung, "Poyir abué mombati kísadag, akoném píang bige:la aíé ukkutsudag."

     Poyir abu émyémílo Si:nlok 'Confucius' ké aminé lenpo:dag. Bím mo:písok poyirpo:né émna tadgédag. Bí do:píném aí kísapé poyirdungai. Bím takam poyirné abukídí:dok poyirné abué émna:sin lugédag. Bharod mo:rumsok tadgépagya:nam poyirnédé Sanokkyo bíai. 

     Agom atérrok lukapé gímílo, mo:píso poyiné abué kama:ya:mílo silo taniyé kapiné du:lodlo du:ji édémpiné du:lodlo édílosin du:la:ma:yai. Tani:ké turgotso  Poyir abuké béjéko gerríg -ilígnammé kadung. Émdaggom silo aso: aso:pé taniyé béjéla gínamé tani:ké turgodésin angula gídung. Akon légang mé:namdémpéyam aí légango mé:sunamdém iya:dung. Édémpé mé:sunamdo Poyir abukídí:ngésin a:ma:pé du:la:ma:pé idung. Édémpé aí légango:ngé mé:suné poyir abu kídí:ngé ako annyiko Poyir abuémpiné ainé ménggénam amindémsin ajjoukodaggom aima:pé imoma:pé ima:pé ima. Ake ake poyir abué poyirnam írso ankang biyémílo murkong la:lígge:la lé:sula adlad biya:nam agerém iné béjéko kadung. Édémpé ikolo béjéko írso aipé pori-unimangkolo anka:lo béjéko nomborém pangge:la:sin migom ager légangé ankang biyémílo pokurra:ma:la émpé du:pagdag. 

     Émdaggom poyir abuké gerténgém lupagla:nané lugéngé kama. Poyir abubí ainé bélamém írsomé léngkandag. Ané-abubí ododo amig pirnyo:ko olígdag. Édém Poyir abubí poyirge:la amig pirnyiko biseddag. Ru:néké binam amig pirnyidokkilang Poyir abuké binam amig pirnyidokki írso akoné lédupé aro tani: turgodlok aro bélamém ka:pa:la mo:píso ai-kangkanpé turra du:dag. Édémpilai ngoluk Bharod mo:rumso poyi abuém anguné amikki ménggénam agerém idag. Lukanpé lumílo Sorbopolli Radha Krishnobí Poyir abuém airu:pé aipé mé:dagai. Bharotsok Rastropoti akoné poyir abuém anguru:pé aipé mé:nam léga:lok bik onané longédém Poyir Abu longé émna Bharod mo:rum appí:so moírnam agerém írga: po:rumpé idag. 

     Léddarpé lukanmílo poyirnékídí:ngé kama:mílo mo:písok tani: turgodé simín -sike: turgodém turpa:yé émna lula:dag. Émpila poyir abuké du:téngé tani: réngam ara:lo lo:dípé talé:péi du:yaryé émna lula:dag.