SÉ:KON NO
Jiten Noro
Panoi jongki lottaso
obonori kekonsok ansí:né
ésardé sara:bomtung
ke:dang pa:me appunpé
namponé nok aríko
no sê:kon
sé:kon no?
Kombong po:lo lottado
jo:jog appun punkampé
ngok asin ara:bo
no punsa:dung
no sé:kon
sé:kon no?
Ali a:ye líga:do gumrag
maksong songkodo
no ngom ogyabla
gogdung
no se:kon
sé:kon no?
Appíngké aipé
méngkampé ngo:sin
aipé mé:dung
punné appun, unné takar
pétta: mari:
nom ríksulaisong?
No se:kon
sé:kon no?
Aínémpé írga:dung
nom aipé mé:namsé
ngok ta:ng kané
mé:dírém
noíng mé:yok sumodung
no sê:kon
sé:kon no?
Takar karnê do:mírto
ngo ka:pa:dung
ka:yumné karpumpuli
kísapé agamné
nok migmodém
no sé:kon
sé:kon no?
Ronganoi ru:yi:lok
mé:tom mé:boné
mitomko ngo
sikol sijon sulayé
panoi jongki kísapé
do:nyi po:loké ommangé
ngo
kangkin kéba:lo no:íng
dakkansumodung ngom
no sé:kon
sé:kö no?
No sé:kosinmang!
No:íng Mising
dírbí dírlabdé
nouíng mising agom
gomlabdé
mising opíné abotani:ké
obopo:lum omma:ngé
émna lusumonédé no!
No comments:
Post a Comment