RÍSU NGASODÉ:LANG MISING RÉNGAM

Bhaigeswor Pogag

Adí é sékomsin toya:mang. Adíé aíké bédangém mé:pagla édílo:gom gíyodla gímang.Tani: lusuné simínsé adí lékor korkolo korpímínnamang.Édílai kortédla du:pagdoji édém tani:é kinsumang.Édílai kormursula gíkelepsudo.Tani:ké dakoré lékomílo a:né lok assémpé billa gídolo okolai kérénglo kétérén sudo.Kapé okolo gan-yesong sé:koté lupísulamang.Édémí:pé Mising réngamké réngam ager gernamém Do:nyi Po:lo ka:poné abíng bulu, édílai Mising réngamsok ager gerkolo gergabnamégom dung odokké germurnamégom. Édé buluké germurdém germurto émna abo: bola du:pé lagimang. Buluké germur kídarí:dém siloké sí:sangé  kanggabomdola geryinsukupé lagiye.

Mising kídaré adi: tayéto du:dulo angu angu du:té:lok dujonsunam tani: kídarké lédulo, akoné  akonké lédulo lumín pamínsula angu angu du:té:lokké gípan-gíransula aying amo:sopé tokpíto émna do:yingé dung.Akke Adi: ta:yé:toi du:yarra dungkang.Bulum Adi: é émna lukai.Akedé aying amo:pé togyarla aying ami: kídarké lédulo du:mínna du:né ope:dém aying amo:so Misingé émna lukai.Émdogom  Adi: Misingké do:yingé du:sudung.Adi Misingké lenko a:ngko do:yingé kasudung.Émdaggom Mising kídaré Adi:é amo:ngé mépagla aying amo:pé pí:to. Adi: amo:tokké aying amo:so:pé opar oparpé Mising tani:é gíyingamkang émna appíngé ludag.Misingé Adi: amo:tokké gíyi:dodém appíngé lékkopé gíyi:mangai.Angu angu adí:lo angu angu du:téng dakténglokké  gípan gîranna gíto.Bulu okolo dungko dakkoém aipé pa:toji édémí:pé dungkang. Akké Bornoi lakkelok  asi amo:ng ainém mala gíyonkang odokké akedé  Bornoi lagbígdanpé gíyonna gíkang.Supag Mising tani:é Pa:sighat tokké Jia Bhuroli bo:pé dung odokké Sodiya tokké Sontok do:pé dujersula dung.Sim si:ro Kamrup metro dokké ila Mumbai, Dilli: bo:pé du:jersula du:ng.

Mising réngaméi okolai du:daggom aipé du:pé lagiye. Misingé po:pélokkéboi ansi:né réngamko. Bulu ammem pamín momínsula du:lí:mang. Pamín momínsula pijog ga:jogla manggom pajok parokmínsula i:yém lenmomílo Dobur uyyémpiné aimané ajéngé émna ipa:dakku.Émpila Misingé silolo:pé aimané ajéng agerém gerpé pésodag.Édé ta:to ya:yo buluké lubonam kídardokki  réngamsi supaksin angu opínémyang  anguya:né opín pila dung.Ansi:né opíné émna angu opíném mé:titkosunamdé:gom aimang.Aíém larné opínko émna kinkosupa:ye.Aima:né mé:loddém mégela ainé mé:lotko mé:pa:ye.Siloké longso aíém ainé opíné,larné opíné émna léngkansudí  adíé píngangka:bo.Mélo konnoké adído among asié bojedagai.Arík ésingé boje dagai. Silo mélo tani:é bojela gítídung. Among asié ajjautí gídung.Émpila siloké si:sangé opínsok légapé ager germa:mílo sé:ko gerbiyen?Siloké adíso aíké légapé aíé méngkinsuma:mílo amme mé:bima:ye.Mising réngamsok légapé no gílenboma:mí nokké légapé amme gídumsuma:ye.

Mising réngamsé bojeya:pé Asom-Arunachal mimong anyiso du:ya:bandung.Boje:yapé asom –Arunachal lok rísulo Mising opínsé du:ya:dung.Lakhmpur, Tejpur,Biswanath,Dhemaji,Tinsukia,Dibrugarh,Jorhat,Golaghat mo:dum lok rísulo Misingé du:dag.Arunachal mimolok rísu mo:dum kídardé East Kameng, West Kameng,Papumpare,Siang,East Siang, West siang,Lower Dibang valley,Lohit, Namsai,Changlang,Longding kídarké rísulo Mising réngamé du:dag. Nagaland lang Meghalaya mimolok rísu lo:sin dung.Émpila Mising réngamsé supakké rísu ru:sékso aipé odokké o:rípé  ansula ru:supénampé iye. Kapila émyémílo ngolu Asom-Arunachal mimong anyiso du:né opínko. Ngolu mimong anyipakso aipé du:pa:ye.Rísulok du:bosunam bíro angé kídarké lédu:í:lo to:dí to:dílo:pé du:pa:ye.Pamín momínsula du:mílo ngoluké réngamké bojeya:pé ngasodé aya:ye.Supag Bharot sorkaré ngoluké Uttor-Purbansol sokké to:dí to:dílokké  rísu ngasodém  la:pagye émna ludung.Odokké migomé rísu tani: kídarém ríksula lupo taunam agerémsin gerrobdu:bo.So rísulo: du:né tani: kídaré aipé mé:mi ka:mi:la ru:régnam agerém gerpa:ye.Supakké ru:ségnamso du:ng yampo ro:yeké otén omé ao: buluké do:yingé katé dung.So Mising opín kébang TMPK,TMMK, MBK,ABK,ABMK,ADISU,MAK,MMK,MAC lokké daggur gígurboné takamé aipé mé:mík mé:sigdanna ka:pa:ye. Aíké ainam légapé politics ima:pé opínsok me:lam do:yingém aipakpé mé:mo mé:mola, ka:mo ka:mola ka:pa:ye.Rísulok  du:né Mising réngamé Asom so du:mílo okkom pa:yen? Arunachal ara:lo du:mínmílo oko oko ém pa:mín-yen?Sém aiyompé migom lédulo du:la ru:su:pa:ye. Arunachal mimong ara:lok du:né Misingé silo bojeko ngasodla dung.Bulum migomé né:rkula lé:tung.Buluké pa:pénamém migomé bima:la silo ao: ommangé porikolo ngasoddung. Migom ager makolo ngasoddung.Bulu supaksin among allotments, PRC, Caste  certificate, ém pa:ma:la porikolo odokké sakori makolo bojeko ngasodla dung.Sém opín kébang  kídar asutko tomi:la ka:ma:mílo ka:ma:mílo ro: yampo ngasodé bojeya:la gíye.

Opín kébang kídaré rísu lígapé rísu do:yi:sim ru:sudolo kapésin pamín momínsuma:pé ai kampopé ru:bonamko ipa:ye.Kapila émyemílo rísulok du:bosunam biro angé kídarké lédulo ngolu to:dí to:dílo:pé ya:mo yamo:lo:pé du:pa:ye.Yampo ngasodlo kumrílo du:né kídarí:dé ka:dum ka:setsupaye.

Rísu do:ying sém ru:su:dolo Adi, Galo, Nyishi,Kamti-Singpho, Mishmi,Tangsa odokké Nokte réngamlok opín kébang kídarémgom ru:bosupé aido. Kapila émyemílo Mising  do:lung kídardé buluké rísulo manggom buluké lédulo to:dí to:dílokkébo du:bosula dung.Yampo ro:yegom édémí:pé du:bosupaye.Sé do:yi:sém ngo so asutko andé:ngopé kítatto. Sém ru:bo gíbopéné kídardé réngamsok légapé asin obomsula ager gerné kídardé odokké siloké si:sang gí:sane kídardé. Buluké sé do:yi:sém asutko o:ripe mé:bomna ager gerboyepé émna  Mising réngamé mé:dag.