পুনৰুত্থান
ৰিংকুমণি বড়া
ঢকুৱাখনা
দুচকুত নীলা বেদনাৰ চেকুৰা
ওঁঠত এপিয়লা বিষাদ
কপালত শেতা জোন
কলিজাত সপোনৰ জীৱাশ্ম লৈ
কেনেকৈ গাওঁ বাৰু আনন্দৰ গান?
উশাহত ক্লেদাক্ত বতাহ
নিশাহত দুখৰ হুমুনিয়াহ
দুহাতত সমাজৰ শিকলি বন্ধা
দুভৰি পোত খোৱা অবিচাৰৰ পলসেৰে
কেনেকৈ গাওঁ বাৰু স্বাধীনতাৰ গান?
কাৰোবাৰ আঙুলীৰ ঠাৰত নচা
আমাৰ উপেক্ষিত জীৱনেৰে নোটত বন্দী হোৱা
আমাৰ সতীত্বৰে
প্ৰভূত্বৰ
শোষণৰ চাবুকেৰে কোবাই
কোঙা কৰা আমাৰ বিবেকেৰে
কেনেকৈ গাওঁ বাৰু মুকুতিৰ গান?
আমাৰ ৰুদ্ধ প্ৰাণে আজি বিচাৰিছে
মুক্তিৰ সোণালী পথ, মুকলি আকাশ
আমাৰ সত্বাত পুনৰ জ্বলিব লাগিছে
প্ৰতিবাদৰ এটি তেজাল শিখা
No comments:
Post a Comment