TANGARLO JUNÉ MÍMBÍR

Tuniram Médog

Rokomdok rémago:né do:nyido 

Muksubé bénggol du:né

Nok otsurné dumsígdo,

Miga:dag bíé bíkurla

Migyabo:ko muri:né tangaré.

Nok tangarém abo boné

Gítídné míngging kídí:dé,

Moru:suman abungo:lo

Ni:tom modag mitkíramné do:nyié.

Muri: ri:né tangaré

Idaggom nom iríksima:pé,

Namkinnam among aríki

Gítídag no totéd kama:pé.

Mo:díma:né ayirém kedla du:né

Rémago:né ni:tomém kebbomla,

Mí:pag la:ma:nam ayang do:rié

Modír bomdag ngok asinbo.

Asig alongo:pé iné amo:lo

Ayirém boríksuné do:mírto,

Do:pidémpé pida:dag

Nok yirsu yirmul yirnamdé.

Géru:sun tangaré mednam arígdo

Nok aínémpé ka:nam dumíddo

Ngok abu: bu:né asinsé

Lékoném madag mure píangko.