AÍNÉMPIN ARÍGDO

Tuniram Médog

Ya:yoné ésarém Pé:tumla

Langusuma:nam ayirém jonsula, 

Kumripé okum motagdung mukkang

Dité:tém renggo: renggo:la,

Rokom muksubé boriksudung

Tangarlo durji:né ayirém,

Mo:téngé:lé kéno: no:sigé 

Romde:nam aínémpin arígé.

Gíbadma:né longékoném

Ka:tagai dumsigé kangkané, 

Angkuné longédém ka:toku

Ojerdung romde:nam aíné.

Ésarém gíboné Pédo:do

Atí pésoman mínggongko,

Lo:nyio:ko abo bodung

Ainémpin arig kéra:do. 

Yumrang ni:tom kénongém

Tatpí:dung anin asakpe,

Ainémpin aríg kera:pé

Yuptabdung mépagnam amkongé.

Angke:né ayiré rodmínsudung

A:ma:né longédok ké:no tí:lingém,

Kangkin ma:nam ésaré réblígdung 

Ngatur mé:bo bonamém.

Ka:ta-ka:man do:nyido 

Romde:nam aínémpin arigdo, Muri-musagné muksubém 

Ríksudung adírma:né ayirdo.

Doksiri দকচিৰি, জানুৱাৰী, ২০২৩