Gomlab Léga:pé ADNÉ, LA:LENNÉLA: PONÉ OPE:KO

 

Gomlab Léga:pé  

ADNÉ, LA:LENNÉLA: PONÉ OPE:KO

Dr. Abhijit Payeng

     Mising agom gomlab-lo mé:jub mé:labna adanamko gomlabko lagidung. Mé:jub mé:labna adman gomlabé:pag ‘Gomlab’ alamko jikkanna:do. Sulo:pé Mising agom gomlabé kínggí:sa:du:bo émna luna:ma:da. Sok aikampopé pu:pojarponam léga:pé Mising takamé, se:koi ungkoiloi du:daggom méngogsupé lagiye. Agom gomlab mé:bone kídarro: kapésinei aiyarbona:ma émna lusubna luna:do.

    Agom gomlabé aiyardopé adné, la:lennéla: poné ope:ko lagidag. Ímyemílo lukan kídarsok ako karamgomsin agom gomlabké gíyarko lamté-lo ngasodé a:do. Édémí:pé Mising agom gomlabké lamté-lo:sin a:dung. Agom gomlab mé:boné ope:yé gomlabém addung. Émdogom bojeyang gomlabé la:lenné karamna adnampéi du:pagdung. Dépinamki réngamlokké murkong asolné ope:yé Mising gomlabké lukannam ngasodém kama:pé monam léga:pé daglenmílo aiyépé émna mé:namko kadung. Nokké daglennam, odokké Mising gomlabko la:lennam mé:loddo Mising agom gomlabém aiyardopé kínggí:né a:ngko biyepé. Kaje Mising agom gomlab la:lenkolo daglennai.

    Adné kídaré ménggabdanna gomlablok akangém kínggí:mopé iye. Adné  kídarlok adgod lo:pag réngamém ainé aimang do:yingém kíkanané kuse:re:dé dung émna ludaggom lumurmang. Gomlabkoné réngam akolok arsipé ido. Arsilo kapé migmo:ém ka:suna mo:si:sudoji, édémí:pé gomlabém pona réngamlok do:yingém kinna:do. Lupé lumílo gomlab-lo réngamlok moyimangém ka:pa: po:pa:do. Dépinamki Mising gomlab adné kídaré Mising réngam-lo ibom gíbomnam do:yingémpag adbommílo aido. Kapésin admur adyarra: adpé lagima:ye. Nokké silok ménggoddé, adgoddé yampo ko:su Mising agom gomlablok alampé ipéné.

    Gomlabém addunggom, Agom gomlab kadunggom poné kídaré poma:mílo édé gomlabdé pa:pénam ayangko réngamlok aroru:pé pa:dung émna luna:mang. Dépina Mising réngamé gomlabém pona ‘Gomlab’ké aiyarnam do:yingko mé:ségpé idung. Odokké anu ménggodki réngamém aiyarbopé lagiye.

Mi:tom bí:gom mé:tomki lukantung sémpé –

Mimé Miganga

Agom gomlab léga:pé

Nokké:gom kadupéda

Gerpénam akangko –

No adropto gomlabko

Daglento No

Gomlabko la:lendopé

Gomlabém pona lukantoi

Ainé alamko

Kínggí:dope gomlabké 

Bédgo bédangé – .

Mimé miganga

Nokké:gom kadu:péda

Gerpénam akangko…

                (Mimé miganga) 

Mising agom gomlabém pona ainam-aimangko ange:na, kapé admílo gomlabké lambé bédangé aiyaryeji édém kíkanmílo aido. Kapéné poné kídaré:pag mé:mí:sagmi:na, anna ka:na lukanna:do. Gomlabkoné kínggí:na aiyarpé poné kídarké ka:yin luyinko lagiru:do. Gomlablok mé:jub mé:labné ope:sin sém gomlab-lo aipéi lagidag émna lukantung. Émnamé poné kídaré a:té:ma:pé agom golabkoné kapésinéi aiyar na:ma:ye. Adné kídaré:sin popodopé gomlabém admílo aido. Poné kídarké poní:tídopé, pona mé:mi:na mé:potídopé. Dépé ima:mílo poné asagé:sin gomlabém polí:ma:yepé. Kinné pa:néké lukampé ‘Ainé agom gomlabém appíngéi poní:do. Bí édílo:sin kapésinéi lédu mokutsuma:ye. Appíngéi bím oríg boríg suye.’ Émnamé adné kídaré aré kané gomlabko poné réngam lo:pé urrígnam léga:pé angkekene:pé admílo aido. ##

Teaching Associate (Mising)

Dept. of MIL & LS, Gauhati University

E-mail : apayeng@gmail.com, Mobile : 9678782792

Doksiri দকচিৰি, জানুৱাৰী, ২০২৩