ADÍ ÉSARRO TMPK ÉLANG MISING RÉNGAM 

Dr. Abhijit Pa:yeng

   O:rípé mé:mi:na mé:na ka:mí:loi mé:begdo….. Pori-luriné opeyé ainé Tani:pé badna réngamkoném ainé bédgo-bédangko síggébona:do. Édémí:pé Mising réngamémgom poriné opeyé aibonam do:yingko mé:robbomna lékona agerém gerrobbopé ibomkang. 

Édémbulum sémpé pokanna ka:na:do - A:ném mé:boné Mising réngam lokké odokkéboi Pu:mu asi, donam-tínam, dungko-dakko, génam-bomnam, lambé pédu atí-atí ngasodé kadung. Édémí:pina Mising réngamkoné porin-lurinamém lute:na atí-atílo lédu mokutsna du:dung. Édém kapésinéi topagla:mang. Émnamé édé ngasod kídardém kama:pé monam léga:pé Migomém nérkíkpé luposuna:né Ami:kosin Mising réngamlo karamdungai. 

Adíko:lo aso: aso:pé pori-luriné Mising Ope:koné lenrobna Mising réngamlokké ngasodém kapé ka:ma:pé mona:yen atí-atí do:yingém ru:suropkang. Odokké Mising dungko-dungkolo ‘Poriné Kébang’ ba:lenna Mising réngamém aiyarbonam ager tarungém gerobbomkang. Édémí:pé Mising dungko-dungko mo:leg-mo:leglo ba:lennam édé ‘Poriné Kébang’ kídardém lékopé gokkum su:na dítag 1971, longkí 16-17 Oktuborro Jonai Higher Secondary School-lo kébangko bangka. Odo kéba:do poriné ope:lokké kébangém kínggí:monam léga:pé ‘Asom-NEFA Mising Student Union’-ém ba:lenka. Édé kébangí:dém dítag 1974, longkí 25-27 Mars-do Dhemaji Sisimukh-lo ba:nam po:péngarké dítag ba:sar kéba:lo ‘Asom-Arunachal Mising Student Union’ émna minten kaku. Édémí:pé dítag 1978, longkí 4 Mai-lo Dergaon-lok ba:nam mélík ager ajon kéba:do ‘Sodou Mising Student Union’ émna, odokké dítag 1985, longkí 22-24 Febuari-do Majuli Jengraimukh-lo ba:nam aumné ba:sar kéba:do ‘Takam Mising Poriné Kébang’ émna mintoku. ‘Asom-NEFA Student Union’-é édémpé adí-adílo anguyonna ‘TMPK’ aminki su: appíngé kinjarkang.

Su TMPK-é aín bíríg dítagém moí:rra do:pín ajikko jigdung. Buluké Mimag bélamlo mépagna gíkuné lo:yid Nores, Boga, Anjona odokké aíké turgoém guniya mosuné takamém kumpa:dungku. Mising réngam léga:pé éddíko okkom ka:pé mona:ton mé:mi-mé:lapko mé:na ka:dungku. Odokké a:péné adíso kapé ígíngém séggitsupa:yen ? Édémsin ka:yarra odokké mé:yarra ka:dung. Se:kobulu Mising réngamsok pu:pojarponam léga:pé ager gerra gídunga:ji buluk ager alamém lékoném mé:pa: dungku. Odokké sí:sa:né takamém Mising réngam lokké ager gernam léga:pé aséng agomko lukandung. Kapéné réngam ko:lok ainam-aimang do:yingém sí:sa:n ope:ké ménggotki kinna:do. É, mé:mi:na ka:mí:lo TMPK élang Mising réngamém lupansuna:mang. Akondém mége:na akondokké do:yingém kapésinéi mé:na:mang. Adoli-iki: ko:lokké kekon-kesakpé idag.  

Adí ésaré adí-adíko:lo sarkup-sarrabdogom TMPK-élang Mising réngamé turnané bélamko síggéyonna gídung odokké:boi. Édé mé:loddé ro-yamposin mé:yarnané a:ngko a:moyepé émna mé:namko pa:na:do. Édém kapésinéi lupagla:mang. Édémí:pé Mising réngamém aiyarbonam léga:pé dakorkoda dayarra dítag 1993, longkí 27-28 Mars-lo Jonai-lo du:né Murkong Selek Mising Kristi Bhawan-lo Mising lokké kébang kídarém gokkumsuna ba:nam appi:né ‘Bottané Kébang’ (Jatiyo abhivartan)-do, TMPK lokké mimag mojon kébang kísapé ‘Mising Mimag Kébang’ (MMK)-ém ba:lenna ‘Swayatva Shasan’ (Autonomus) odokké atí-atí binam léga:pé Migomém do:di: moropnam léga:pé réngamém gogropka. Odokki Mimag mona pa:pénamém migomé dítag 1995, 14th June-do ‘Mising Autonomius Council’ (MAC) émna bitu:sinbo. Émdogom aíém éddíko aiyarmosuna:du:n édégom mé:pénampé idung.   

Akon annyiye aima:pé mé:dogom, atsar ma:mílo do:yingko kíno:nampé iye. Siyum-sí:ro ka:namé aso: aso:pé TMPK-é buluké gerpénam agerém germa:pé, buluké gípénam lambélo gíyarma:pé ‘Poltical’-lo yonnu:sudu:némpé andung. Édémbulum ka:mi:na, mé:mi:na ka:yémílo TMPK-ké mé:lamé kapiyen ? Émnam do:yingkosin a:dung. Bulu leke:kémpé aíké mé:lodki ager gerrang kuma:némpé idung. Sékkaiké urríkkipag gernamém ka:pa:dung. Édé kapésinéi ainé do:yi:mang émna kinné pa:né takamé lunamém tatpa:dung. 

Aíké mé:mi: mé:lapko karamtína gímílo a:péné adíso TMPK-é leke kémpé Mising réngamlo ayang aboko pa:tí:na:yekunei….? Édém TMPK-ké gígé daggéboné opeyé mé:mi:na mé:díka:bo émna mé:namkosin a:dung.  TMPK Írroi ! Mising réngam Írroi ! 

 

Teaching Associate (Mising)

Dept. of MIL & LS, Gauhati University

Gauhati-14 (Assam), Mobile: 9678782792

Doksiri দকচিৰি, মাৰ্চ, ২০২৩