কেনেকৈ
ধন দাস
এক ভ্ৰম বিলাস
জীয়াই থকাৰ যি হেঁপাহ
সকলো অৰ্থ নস্যাত কৰাৰ পিছতো
জীৱনৰ ললিপপ্ চুপি চুপি
আখৰাত ব্যস্ত পৃথিৱী
মিছা কথা
মিছা ছবি
মিথ্যাচাৰত বন্দী পৃথিৱী
মানুহ হোৱাৰ ৰিহাৰ্চেল
ধৰ্মৰ বৰশীত ওঁঠ চিলাই
মনে মনে আছে সকলো
ৰজাৰ বিৰুদ্ধে
নিজৰ বিৰুদ্ধে
ক'লা পলিথিনত মেৰিয়াই থোৱা
কথাবোৰ ফাদিল কৰিব পৰা নাই
ধৃতৰাষ্ট্ৰৰ দৰে
এশ পুত্ৰৰ অনৰ্থক জলাঞ্জলী
ৰসায়নিক দিনপঞ্জী
জীৱন এক বেপাৰ
নাটক-সংলাপ-বেকগ্ৰাউণ্ড মিউজিক
ফ্ৰী চাউলৰ ভাত
ৰাজনীতিত বৰ বৰ মাত
শ্ৰমৰ আঙুলি কাট
এতিয়া মেল-মিটিঙটো গান্ধীৰ হাত
কি ক'ব
একো নোকোৱাটোও এক জেহাদ
জীৱন এখন আইনা
ডিঙিত ফুলাম গামোছা
কথাবোৰ নীলা
প্ৰতিবাদ কৰ সকলো পাবি
শ্ল'গান নিদিলে আঁজুৰি আনিবি
এনেকৈয়ো জানো পাৰি
জীৱনৰ মৃত্যু ভয়
অসুখৰ প্ৰতিষেধক
মেডিটেশ্যণ
প্ৰাত: ভ্ৰমণ
হাতত তেজৰ নমুনা
পৰীক্ষাগাৰৰ সন্মুখত অপেক্ষা
জীয়াই থকাটোৱে আটাইতকৈ দৰকাৰী কাম
শ্মশানত কেনেকৈ সম্ভব শিল্প
নাটকীয় বাস্তৱ
নকঁও আৰু…..
ফোনঃ ৯৬৭৮০৯০০৩৩
Doksiri দকচিৰি, মে, ২০২৩
No comments:
Post a Comment