Nébíngké Lupénam

 Nébíngké Lupénam  সম্পাদকীয়....

Ané-Abu: Kísa:pé Ommangém Ayirko Bila Ka:si-mosi:tok

 

(অভিভাৱক হিচাপে সন্তানক সময় দি প্ৰতিপালন কৰক)

   Aipénédé ajjoudokkéboi aidag. Édé luyir agomo:mang édé aro: agomé. Pinnyo kané tani:ésin lugé:la gítung sémpé aipénédém ko:kadokkéboi kangkindag. Édé agomdém ayyop kinnam légangé English Gomlab-lok pinnyo kané John Milton-ké lunam agomko attenníktung - "Children show the man, as morning shows the day." This comparison draws a parallel between the early signs of a child's development and the indications of the weather in the morning". Ngolukké sé mo:pí:so ai-kampo:pé turra du:né takam tani:é ainam légangé mimagém mola du:pé ido. Ngolu tani kisapé turra du:namlok luké:déi aila-mé:po:la du:namdé. Mé:pola du:lanamdé béttéyapagné kusere:é.

   Aíké adín-amírdém kinam ramnam a:mayepé émna ngolu kapé míryirsula (ব্যায়াম) du:pénampé idoji édémípé mé:po sakpo:la ai-kampo:pé du:nam légangé ngolu asinsém mé:po ménganna du:monam légangé asin míryirsunamko ipé ido. Kapilané ngolu okodém loddém ido:ji édéi ngolukképé íyidnam-pé (অভ্যাস) ido. Ainé íyidnam kídí:dém ngolu agínpé du:yarmolamílo ngolu turdo takamso mé:po ménganla du:lado.

   Ngolukké Aila du:nam, mé:po ménganna du:namdé akondokké akondopé gíyon-gísonsudo. Sido ngo kinam virus-lok angkosunédém lupé mé:mang. Ngolukké (Nokké) ainé ilod gíloddém ngolukké ao:ommang kídí:dé ka:yir-moyirsunamdok ilod-gíloddémpag lupé mé:dung. Ajjo:n ko:kangé kampo:n kagojé. Bulum ngolu lumírpésin aiman agomko lulamang. Germurpésin aiman agerko gerkannamang. Ajjouné ko:kangé okodém ka:begdagji okodém tadbegdaji édéméi ka:yir moyirsudag. Édém kangga-tadgabla luyirbommamílo éddíng bulukképé du:yarné íyidnampé ipagdag. Émpila ngolu Ané-Abu: kísapé aíké ao:ommangém ayyopé ayirko bila ka:si-mosi:pénampé idag.

   Ané-Abu: kísapé ao:ommangém ayirko bila ka:si-mosinam ayirdé bulukké ko:ka:dok sí:sa:la gínan ayirdé. Dítag 3 dokké 16 dopé ommangém ainé dungkéngko bila aine agomko lukaila, ainé agerko gerkaila léngkanmílo lédu:ké ayirkídídém bulu aíwéi ainé lamtéko balensukindag. Ané-Abu: kisapé ommang lédulo longé:lo:bungko dunggappénam kamang. Ayirém kanggabla ainé agerkídídém, ainé agomkídídém lukaimiloi aido.

    No ané-abu: kisapé ommangém yari yardí:do yari yarmo:paye, podo ayirdo pokaipaye. Édé ajjo: ajjouné agerkídídém ané-abu: kisapé no lo:bagmílo turdo takamdoi nok ao:ommang légapé mé:dírém mé:paye, ngasodém pa:tíye. Émpila ngolu ainé ané-abu: kisapé ajjon ommangém kínggípé (কঠোৰভাৱে) kanggabru:paye. Odopak ngolukké méngkampé ko:kadok kampo:n kagojémpé bulum aidopé pa:ladyeku.

Tapan Lal

Nébíng (সম্পাদক)

Doksiri দকচিৰি

Doksiri দকচিৰি, এপ্ৰিল, ২০২৩