KOMBONG A:YEKUMÍLO

 

KOMBONG A:YEKUMÍLO

Tuniram Medak

Kangkinma:nam ésaré sardolo

Nok angkunamém anpa:yemíloi,

Yuptabné si:lungé:lé si:suré

Gejigné abe:yém be:dag. 

Okum gíkuné bottané ésardo 

Ame:né okumlok turnamdé, 

Yummangé ogyabné ma:nyi:do 

Miksi réjinla du:dag, 

Do:nyi omitkobokké mukka:dé 

Dité:tém dosukkapé gídag 

Mépag mépagla ginamém ka:la

Mé:résuné arígé:lé tarungém ru:dag.

So:yuké kabnamém tadla

Ji:man asiném rago ko:dag,

Nom ríksula lula:ma:nam agomdé 

Yogír tangémpé asimém níkkardag. 

Yaka katugné yumédo 

Po:lobí dumlubém géla; 

Sarsu sarmun ésardo

Nok ríkseng ayangém matadag, 

Bi:sam samné yumra:lo

Pakkom pagbo: kabdodo

Gordu:bérné ke:dangém jonsula

Nampopé keteki appuné pundag.

Dungko jo:jog punlégdo

Mé:bo mé:mínsuné ya:me-mímbíré,

Dumdum pempa métédla

Ka:sut-ka:ludnam do:lungé:lém

Ka:tíla du:dag miktéd kama:pé.

Doksiri দকচিৰি, মে, ২০২৩