MISINGKÉ NGASOD

Horish Dole:

     Érang ako kumda: da:la du:pé among in-yopko kapa:yé, édémí:pé opín akosin turra du:pé aí agom, dírbí, yelam édémbulum lugéng igé:péko aíké rísu kané mo:lékko kapa:yé. Aíké aték mo:légé kama:mílo ami tani: béjéyangko ara:do Misingémpiné ame:né opíndé aí agom-dírbí lusu -isula a:péné adílo aí kangkiném turmonamdé béttéru:né ngasod do:yingé. Siloké adíso Mising taniyé béjékoi mo:dum mo:léglo do:lu lu:la du:pomdung. Émpige:la soggarké ngok du:téngé émna lusula:ma. Silo ya:yang yampo ya:yang nérkíkpé Mising tani: dungkokídí:do:sin ami taniyédan béjéya:la gídung. Taniyé bík du:té:do oko opíndok taniyé béjéya:yéji édé opíndok ilod-gilod imínnam agomdém lumínnam édém iya:dag. Ami agomdaggom luyittíla du:mílo édé agomdé tatpodag odokké lupodag. Tatpopé tadla lupopé oko agomdém luyidyeji édé agomdé longékoné aíké ané agomdémyam aré kaya:dakku odokké asiné édí longélo édémpé mé:robyéji édé longédokké aíké ané agomdém aíéi mé:loyé. Mé:lonam agomdém lunné kama:la aso: aso:pé longékoné mo:písokké siya:la gípagdag. 

     Mising opínsé:sin siloké mo:písok siya:la gíné opínkídí:dok ako. Rísu kama:né du:té:do ami tani: gi:lu-gí:busula dungko ara:do Mising opínsé:sin longngém longépé aí kangkiném yogmola gídung. Sé:kai akon asagé migom donam légangé Misingém turyarbonam do:yingko lunombodogom aro mé:tomki ager gerbonammém silopé Mising tani: ara:lo ka:pa:ma. Édémpé Mising tani: ara:lo nérkíkpé aí opíném aipé mé:la daggurné midumko lenmangkolo Mising opínsé aí du:té:loi ami kéíglo turpé idung. Silo Misingé lígang, doburé a:yémílo migom ager gernékídí:ngé aí méngkampé aí gí:dí-sí:píém moírra:ma. Aíké agom turmonam légangé pogolo aí agomki poyirnammém ila:ma. Sokkéna ngok du:téngé émna:sin lubisula:ma. Silo Misingé turpé ami agomém ané agomé émna tosupa:yé. Pogolo ami agomkiy kin-goém la:pa:yé. Ami ilod-gilodém aí tosula imínpa:yé. Lupé lumílo Misingé aí kísapé turki mo:dulok ami kéíglok turné opínko. 

     Opínsém turyarmonam légangé aro asinki daggurné midumko silopé lenma:namdé Mising opínké béttéru:né ngasodé. Opínsém turyarmonam légangé ager gerpéné opín kébangé, BK, MMK, TMPK, MAK, DK émna béjérungkoi kébangé kadung. Émdaggom édé kébangkídí:dé Mising opínsém siloké ikí -iyar kané adíso turmínla:dopé pí:namko agerém gerra:ma:namdé béttéru:né mé:pénam do:yingé. Édé do:yi:dém kinsula silo ainé migang ga:né midumkoné opíném daggurra turnané bédangém léngkanma:lo longékoném Mising émnam amindém sékkaiké potinlok tamténgkolok matapa:yéku.

Doksiri দকচিৰি, মে, ২০২৩