RÉNGAMÉ:LA SÍ:SANG OPE:

 

RÉNGAMÉ:LA: SÍ:SANG OPE:

Dr. Abhijit Pa:yeng

    Sí:sangé ro:-yampo réngamsok gígé daggé-bopéné émna ludo. Dépina buluk pu:po-jarponam léga:pé mé:mi:-sagmi:na mé:pénammé bojekoi kadung. Sí:sangké mé:nam, gínamé:la: gérnamé aimílo réngamé:gom ayyerung émna luna:do. Dépima:mílo réngamlok ainamko ngolu kapésinéi mé:na:ma:yé. ‘Globelaisation’ké adíso:tu dé bulum orí:pé mé:díé angka:bo. Porinam, migom ager, okum-rínggongé:la: murkong atí-atí:lo lédumokutsun du:né réngamsok sí:sangé ungkolo:pé pí:na:du:bo:ji kinné asagé kindung. Angkirém tídsuna méngkitsuna turgo mimagém moné sabna:namko si:sangé:pag aíké aminém réngamlo lukansu:na:dung. Bojeyangko gípí:mo:pí:mínna:ma:na mé:nangoi du:pag dung. Dok buluk léga:pé kínggí:ru:né ager tarungko laginam do:yingém se:kosinéi topag ma:yépé. Abí:ya:né kídaré:sin sí:sang ope:é ainé lambé-bélamki dakorém kordu:ye korma:ye ayyo:pé angabna kanggab, tadgappé idung. Buluk léga:pé mé:pé:namé, buluk léga:pé gerpénamé appíngkéi kadung. Ngolu lutad, potin, lusar atí-atílo réngamsok ake-ake sí:sangé dopéma:namém dona, gípéma:tí:lo gína aílo, ope:émla: réngamlo ngasodém a:mo:nammém kinna:dung. Bulum luyirra ainé bédgo-bédangko léngkannamdé:pag appíngké émna luna:do. Kapéné, bulu réngamí:sokké kosagko. Buluk ainam-aimangko mé:ma:pé réngamsok pu:po-jarponamko kapésinéi mé:na:ma émna ludaggom lumurma:yé. Ake-ake:é sí:sangké méngkampéi imo-gímonammémsin ka:pa:dung. Dé bulu éddíko kabodu:ji lékoném mé:mi:namdé ayyépé émna mé:namkosin kadung. Sí:sang adíé turgolok émpagémyang aré kaya:pagné adí:é. Démmí: miro kídaré:sin ai-kangkanpé lukantung. Dépina kinsun kídaré sí:sang ope:ém aipé gíkan-dakkanpé idung.

    Kinnampé rogmíd kama:né épugdé aipé mo:dé:pé yu:na:ma. Démmí:pé lukannéko ka:ma:né si:sang ope:é aipé mé:mín daggom, mé:nampé momín-gímín na:ma. Sokki luna:do “Si:sang ope:ém kínggí:monam léga:pé moyir-gíyir-dagyirnéko lagiru:dung”. Ngolu adí-adí:ko:lo ka:pa:dung, ake-ake: si:sangé ro:-yumépé apo:-potika: tíngír suge:na abu-ané, angé-bírmé kangkinma:pé, no:si-no:mangém luna, tadna dunggu:ma:nam do:yingém kídag. Sémpin ménggod-gígod-yegod-daggodki sí:sang ope:é réngamsém ro:-yampo kapiné moyimangko léngkanyeji méngkinné akon-asagé méngkindung. Akon anni:é mé:yi:daggom arro “Taun, do:lu: atí-atílo du:né siyum-sí:rok bojeyangko sí:sangé apo:-potika:lo abu:bu:na dunamém ka:pa:dung. Donam-tí:nam, ni:tom-so:manko émyémílo kíngabna:pé gíkumsunamém ka:pa:dag. Réngam ainam léga:pé ager ru:su: kébangko émyémílo sabna:nammo:ko daglendag. Sé ainé do:yingéi ? Ake-ake:é taunno dung émna lusudag, émpige:na mégod-gígod-yegod-daggodé angunammém ka:pa:mang.” Sémpiné ménggod-gígod-yegod-daggodki sí:sang ope:é réngamsém unjarboyé émna mé:na:yén …..? Sé do:yi:sém mé:mi-sagmi:na mé:di adíé a:píka:bo. Sí:sang ope:ké ainam léga:pé ager tarungko ru:ropdopé dagropdí adí:é apí:ka:bo. Appíngé kinsuna aimonané tarungko mé:ma:mílo réngamlo kémoné mukkangé yinga:yebo:némpé andung. Dépima:mílo ngolu méngkinné takamé ro:-yampo réngam ara:sok sí:sangké ngasodém ka:na angkéngém kígsuna, miksiém tídsupa:yépé. Dé bulu aipé kéra:pé a:pídandu:némpé andung. Dépina méngkinné takamém lupa:dung, ngolu ungkoloi du:daggom si:sangé aima:né lambélo:pé gíyodma:do:pé luyirko lunai. Kapéné, sí:sangé réngamlok arékanéko. Nolukké-ngolukké émmín-suma:pé aima:né agerro gínam-monamko ka:begyémílo luyirko lumílo ayyépé émna mé:namko kadung. Ngolu TV, Radio dokké lutad atí-atílo sí:sangké imur-gímurém ro:-yumépé tadpa:-popa:tína dung. Sok bulukki siyum-sí:rok sí:sang ope:ké ménggod-gígod-yegod-daggodko ayyo:pé kinna:dung. Aipéi mé:pénamé, réngam ara:lo ngasodém a:mo:né émpag aima:né agerro sí:sangé du:té:dung. Ngoluk réngamlo ngasodém a:mo:né ugrapanti:lo:sin sí:sangé a:dung émnamém ka:beg-tadbegdung. Sé aipéi aima:né do:yingé, dokki sí:sangém aima:né lamtelo gímursuma:do:pé réngamlok mékinné kídaré anu ager tarungko mé:mi-sagmi:na mé:lendíka:bo. 

    Anka:mínsudí adíso, ake-ake:é akon-anni:ém pagbadge:na ainé agerko gerra réngam ara:lo aíém léngkansunam léga:pé yumnam-donamém mékudsuge:na angkir tídsuna pagbadya:né agerém gerbomdung. Démmí:pé ake-ake:é aíé méngkinsuma:pé akon-anni:ké do:yingém tanna aima:né agerro gína aíém aima:pé mosu:du:rung, réngamémgom longé-yumépé urrad modung. Gípéma:tí lambélo gína, abbukkokki réngam lo:pé kapésinéi unné ruwadko a:monama:yé. Kapéiki mé:mur-gímur dunggom lékoda mé:ladsunangkuna ainé lo:pé dakorém korradyékupé émna gímur-mé:mursuné sí:sangém lupangko kadung. Odokké réngam ara:lo yamném na:díma:pé na:nam, amilo gídíma:pé gínam méngapna:ma:nam ngasodkoda adung. Simgom orí:pé mé:díka:bo. Attérso, Ang-asin tolígna do:ying-do:bo:kokki:pag réngamsok atí-atí ngasodém kama:pé mona:yépé. Pongkuné ang-asinki édílo:sin mona:ma:yé. Kaje, appíngé réngamsok pu:po-jarponam léga:pé sí:sangém ainé ager taru: lo:pé gogroplai.

Ríksuko:- Mothowkhur, Lokhimpur, Assam

E-mail: apayeng@gmail.com, Mobile: 9678782792 

Doksiri দকচিৰি, জুন, ২০২৩