BA:BU 

Tapan Lal

Ko:ka:dokké ka:si:la ka:sa:bomné no

Ajjau:né ko:dém botta:né ma:nyingém

Mangkaiboné no

Mé:pinsu:la mé:la du:yok

Mo:jarné mo:pí:sé noggongkémang

Dagrubla dugma:mílo

Aíké rungkí:ko dukpí:pémang 

Luyirém lukainé, agerém gerkainé

Ru:némésin kínggí:yané 

Nowíng ngokké ayang ba:bu:é

Bégbélné a:ngém kínggí:moné no

Mola:ma:nam agerém anu a:ngki sagla

Itung tu:né bélamém léngkanbiné no

Ommang ainam légangé

Gordu:do mé:dírém jo:bomné no

Kamangarnémpé aíké mé:díré

Yirra yirra mo:pí:sém ka:bo:moné no

Mé:dírro mé:pinsu:n asiném

Mé:sarsuboné no

Ngasodla du:né tani:ém

Ka:dumsuboné no

Nowíng ngokké mé:tinsunamé

Nowíng ngokké ka:tinsunamé

Nowíng ngokké anu ma:nyingé

Nowíng ngokké anu bélamé

Nowíng ngokké mé:bo mo:pí:é

Nowíng ngokké aro migangé

Nowíng ngokké ayang ba:bu:é

Ommang turyingém ka:si: mosi:né

Nowíng ngokké aya:la gognam

Ayang Ba:bu:é.