DO:LUNGÍNG AIYA:DO

Mg. Bhobo Dole:

Do:lungíng aiya:do

Dong among ka:napé

Do:ying-do:mong mo:pído

Asin oka:mínsupé.

Do:lungí:dé aiya:do

Rokpo línggung tadnapé

Ki:par gomug ku:namko

Rémi-jémi:p tadla:pé.

Do:lungídé aiyya:do

Do:nyi dongkong ka:napé

Bo:bi lo:lin ésardo

Oi-ni:tom tomnapé. 

Do:lungídé aiya:do

Do:mír miksi du:napé

Pédong bírdug a:dodo

Gene ayang pa:napé.

Do:lungíng aiya:do

Tangar ku:posunapé

Galling po:lo a:dodo

Aín a:m gadnapé. 

Do:lungíng aiya:do

Ki:pu dodgang punapé

Ayang gasumsum sumdodo

Tani: mirum rumnapé. 

Do:lungíng aiya:do

Réngam bomna donapé

Ganggo-sígo a:dolo

Ayang bimínsunapé.

Do:lungíng aiya:do

Sima: dum dum démnapé

Mé:dír miksi dídodo

Dídumsula du:napé.