আপোনাৰো এটা বাট আছে
জিতুপন শইকীয়া
আপুনি আমাৰ মুখলৈ চাব নোখোজে
আপোনাৰ মানুহৰ মুখবোৰ আমাৰ দৰে নহয়
নে আমাৰ মুখবোৰ আপোনাৰ মানুহৰ দৰে !
আপুনি অলপ হিংসা কৰে আমাক
আমি আপোনাক হিংসা নকৰাকৈ চলি থকাৰ বাবে
আমি হিমালয়ৰ শিখৰ চুলেও
আপোনাৰ শিহৰণ নাজাগে
তাৰ ঠাইত অশান্তি এটাই বাহ সাজে নেকি দিনে ৰাতি
তেজে তেজে ক'ৰবাত মিল আছে
আপুনি হয়তো জানে,বা নাজানে
আপুনি যি দৰে ভাৱে আমিও ভাৱো
অথচ আপুনি আমাৰ ভাৱনাক একাষৰীয়া কৰে
আপুনি দেখা সপোনতো এদিন
ককাদেউতাই সমানে দি গৈছিল সকলোকে
আপুনি দেখা সপোনটো পাহৰিব দিয়া নাই আইয়ে
একেই সপোন আপুনি আপোনাৰ ঠাইত দেখে
আমি আমাৰ ঠাইত দেখোঁ
আপুনি চাগৈ ভাবিছে সপোনটো কেৱল আপোনাৰ!!
আইয়ে যোৱাৰ পৰত কৈছিল-
মানুহ এনেকৈয়ে আহে আৰু যায়
সপোন একেই থাকে
সকলোৰে
আপুনি হয়তো পাহৰিছে
আপোনাৰো এটা বাট আছে!!
Doksiri দকচিৰি, জুলাই, ২০২৩
No comments:
Post a Comment