নৈ পৰীয়া অনুভৱ
কৃষ্ণ কান্ত মৰাং
নৈ পৰীয়া আবেগ এটাই
জুৰি আছে হৃদয়
মৌচুমীৰ জোৱাৰত ভাঁহে
সুখ দুখৰ ছবি
খেপিয়াই উমান লওঁ
দীঘ পুতল বাণি
জাঁজৰিৰ বুকুত পাৰ হৈ
অনেক শাওণ ভাদ
দৃষ্টিত ওলমে
বানে ধোৱা ছবিৰ
ৰং হীন পট
অথবা
প্ৰাচুৰ্যৰ এমুঠি ৰং
এনেকৈয়ে,
সাবতো সোণালী আঘোণ
সৰিয়হৰ হালধীয়া সুবাস
কেতিয়াবা জ্বলে হিয়াত
বিষাদৰ একুৰা জুই
কেতিয়াবা প্ৰাচুৰ্যৰ
এমোকুৰা সুখ
নদীৰ সীমনাত খেপিয়াই
উমান লওঁ
নতুনত পু্ৰণি গোন্ধ
নোপোৱাৰ তিক্ততা
ঠেলি আঁতৰাও
সানি বিনন্দীয়া বোল
ক্ৰমশ ভটিয়াই
পালতৰা নাও
দুয়োপাৰে ৰিঙিয়াই
ৰৈ যা ৰৈ যা -------
ওভটনি সোঁতৰ
ঘূৰণি পাকত
ধূসৰ হৈ ওপঙে
জীৱন আবেলিৰ ছাঁ
বুকুত বাজে নৈ পৰীয়া সুৰ----
ইয়াং চিকিয়াং
লুইত -অবনৰীৰ
সেউজ সাৰুৱা গান !!
Doksiri দকচিৰি, জুলাই, ২০২৩
No comments:
Post a Comment