জংকি-পানৈৰ মুলুকত

 

জংকি-পানৈৰ মুলুকত

                                কল্পনা দলে পাংগিং

                                    উত্তৰ লক্ষীমপুৰ

ধলঘাটৰ সিপাৰে

সোৱণশিৰিৰ পাৰতে

ঘুনাসুঁতি গাঁৱত

জংকি-পানৈৰ মুলুক,

সোৱণশিৰিৰ এইপাৰে

মোৰ মৰমৰ গাঁওখনি,

আঘোণৰ আগমণিত

সৰিয়হৰ পৰশমণি,

দুয়োপাৰ হালধীয়াৰ বোলনি,

মাজে বৈ যায় সোঁৱণশিৰি ;

ফাগুনৰ আগমণিত

পলাশ, শিমলুৰ সুবাসমণি,

য়াঃমে মৃম্‌বৃৰহঁতৰ বুকুতে

জংকি- পানৈৰ সুহুৰি ;

লৃগাঙৰ পৰশত পঃৰ আপঙৰ ৰাগি,

য়া:মেহঁতৰ দোম্ দোম্ ৰ চেও

মৃম্ বৃৰ্ হঁতৰ গাত গোম্‌ৰাগৰ দেও;

কাৰ ঐনি:তমৰ সুৰত কোনেবা বানিছে বুকুতে ধান,

দিছে জানো কোনোবাই কাণ ,

ডেকা বুঢ়া সকলোৰে লৃগাঙতে ধ্যান

লৃগাং যে আমাৰ প্ৰাণ,

ৰাখিবতো লাগিব মান ৷

লৃগাঙৰ বতৰ যায়

সোৱণশিৰি পৰীয়াই গুনি খেতিত লাগি যায় ,

আকৌ আহে বহাগ,

মিচিং-মিপাগ্ সকলোৰে গাত

ৰঙালীৰ ৰং লাগি যায়

ঘৰে ঘৰে হুচৰি গায়,

এজাৰ ফুলেৰে বহাগেও বিদায় মাগি যায় ;

সোৱণশিৰি পৰীয়াৰ বুকুতে বেজাৰে সুহুৰিয়ায়

হয়তো জংকি-পানৈৰ আত্মায়ো বিনায়,

তেজক পানী কৰি দাই থোৱা

আহু ধানৰ মুঠিবোৰ পানীত ডুবে

বাও ধানবোৰ পলসে পোতে

শালি ধান ৰুবলৈ বতৰে নাতে

গৰাখহনীয়াত ভেটিবোৰ উঠে,

জংকি-পাণৈৰ মুলুকৰ কথা

ভাবিলেই এতিয়া

 বেজাৰ এটি উজায় ৷

(দোম্ দোম্>ঢোল, লু:পি>তাল,গোম্ ৰাগ্ >লৃগাঙৰ বিশেষ নৃত্য, প:ৰ আপং>ছাই মদ,য়া:মে>ডেকা লৰা, মিম্ বিৰ্>গাভৰু ছোৱালী, মাক্ চং>নচা, 

মিপাগ্>মিচিং সকলে অমিচিঙক মিপাগ্ বুলি কয়,গুনি>আহু) ৷

Doksiri দকচিৰি, ছেপ্টেম্বৰ, ২০২৩