চৰিত্ৰ

 

চৰিত্ৰ

মিনু হাজৰিকা

গোৱালপাৰা

      আমি সমাজ পাতি বাস কৰি জীয়াই আছো বাবে আমাৰ গাত কিছুমান গুণ থাকে ৷ তাৰে কিছুমান ভাল আৰু কিছুমান  বেয়া ৷ মানুহ সামাজিক প্ৰাণী। 

      সত্যনিষ্ঠা, ন্যায়পৰায়ণতা, দয়া, ক্ষমা, আদি হৈছে ভাল আৰু মহৎ গুণ ৷ এনে গুণৰ অধিকাৰী ব্যক্তিক চৰিত্ৰবান বোলা হয় ৷ আনহাতে হিংসা , ক্ৰোধ , লোভ আদি দোষেৰে কলংকিত লোকক চৰিত্ৰহীন লোক বোলা হয় ৷ চৰিত্ৰহীন  লোকৰ দোষবোৰৰ বাবে আমাৰ সমাজত অশান্তিৰ সৃষ্টি হয় আৰু তেনে সমাজত মানুহৰ উন্নতি নহয় ৷ চৰিত্ৰবান লোক পবিত্ৰ জলৰ নিচিনা ৷ তেনেলোক নিজে পবিত্ৰ হোৱাৰ উপৰি তেওঁলোকে আনকো পবিত্ৰ কৰে ৷ 

         চৰিত্ৰবান লোকে কেতিয়াও কামত অৱহেলা নকৰে , কাৰো অন্যায় নকৰে ৷ আনে কিবা অন্যায় কৰিলেও সহ্য কৰে ৷ তেওঁলোকে নিজৰ বিবেক বুদ্ধিৰে সদায় মহত কামহে কৰে ৷ তেওঁলোকৰ হৃদয় ক্ষমা , সহানুভূতি, পৰোপকাৰ , মৰম -চেনেহ , দয়া , আদি গুণেৰে সদা পৰিপূৰ্ণ ৷ 

       লোভ , খং , চকুচৰহা আদি গুণে তেওঁলোকক আক্ৰমণ কৰিব নোৱাৰে ৷ আনে কিবা অন্যায় কৰিলেও কোনো ধৰণৰ প্ৰতিবাদ নকৰে  ৷ কোনো কামত কেতিয়াবা পৰাজিত হ’লেও তাৰ বাবে খেদ নকৰে ৷ 

        চৰিত্ৰবান লোকৰ শত্ৰু নাই ৷ তেওঁলোক সকলোৰে সন্মানৰ পাত্ৰ ৷ মহাত্মা গান্ধী , লাল বাহাদুৰ শাস্ত্ৰী , হজৰত মহম্মদ ,  যীশুখ্ৰীষ্ট, আদি বিশ্বপ্ৰসিদ্ধ লোকসকল নিজ চৰিত্ৰৰ গুণতেই আজি মৰিও অমৰ হৈ আছে ৷ কথা এষাৰ আছে , সোণৰ জেউতি অমান্য কৰিলে নকমে ৷ অৰ্থাৎ চিকমিকীয়া সোণৰ জেউতি সদায় একেদৰেই থাকে ৷ ইয়াৰ মনোমোহা আৰু আকৰ্ষণীয় উজ্জ্বলতাৰ বাবেই ইয়াৰ মূল্য বেছি ৷ কোনোবাই কেতিয়াবা সোণৰ উজ্জ্বলতা নাই বুলি ক’লেও ইয়াৰ উজ্জ্বলতা কেতিয়াও নোহোৱা হৈ নাযায় ৷ সেইদৰে গুণী আৰু চৰিত্ৰবান লোকক কোনোবাই অৱজ্ঞা কৰিলেও সেই লোকজনৰ জ্ঞান , গুণ , তথা সন্মান কেতিয়াও কমি নাযায় ৷ গুণী লোক চিৰকাল সোণৰ দৰে উজ্জ্বল হৈ থাকে ৷

Doksiri দকচিৰি, নৱেম্বৰ, ২০২৩