TO:DE: LANG PÍAG KÉ DO:YING

 TO:DE: LANG PÍAG KÉ DO:YING

Bhaigeswor Pogag

Yílé Po:lolok do:ré yumé.aríglokké takamé gía dungkubo.Ta:to ya:yo bulum yaméng kídaré apongém tonna bidung.Pérok péralo porogé dura: dungkubo.Soí nébíng kídar dé So:bo Menjég kídardém rínsi: du:bo.Longé  lo:bu:do miyum kídaré bau amdang doka pagela a:dung.Dígíppé lenam a:mdang kídardé í:ng kamala édém bulum doka pamanggom aiye émna ta:tobí baiyé bulum ludung.Amdang lela:ma:nam kídardém pe:retko piyyépé émna ta:to bí ao: kídardém lubodung.

Ta:to bí otén omum bulum nomkumsudung.Kaje kaje otén omum bulla kaje.Méyum kémpé leke do:ying sinyumsin kíboye. Kaje karé so:pé gílengortoka.Otén omum bulu nampsi gorgora ta:toké arbiya:do du:pé émna dukka:mínsula okumdokké  karépé duglendung.Larné ta:toké arbiyadém pa:to. Mag-yanédé ledu mokutsukang.Appíngé ta:to bí do:ying kíbiye    émna ta:toké nappadém koka ba:la ka:la dung.

Ta:to bí do:yidém kíropkang-“ Taddon otén bulla, lekelo péi péttang,Símín Situmété agom ludungai.Silo nolum édémpiné do:yingko kíbiye.Nolu togabla tallangka dei.          

Do:yi:lok do:yingé.To:dí- yamo do:yingé.Lekelo bottané Bogum sí:lungko dungai.Édé sí:lu:do Agro Píag kolang To:de: péttang dornyi:ko dungngai.Kampo émyém To:de: démyang kampoya:né péttangé amo:so kamangng.Ka:nyingé émyem Píag dém-yang ka:nyi:ya:né péttangé kamang.

Longékolo To:de:bí mé:ngkang –“ Amo:sok bodo:ya:pé tame: kané pétta-péyi:nglok ngokké pak bodo ya:dak. Gényi:ng gésongé.Sémpé bosor-boyorpé éddíko lo:dísém ngo sogo bomna yeyya:n?Ngoggong sé amo:so bosor-boyorné tame:sém jonggobomna dung péttangé.Sé:kai ngok Tame:sém koyyamílo bippai.” Bí édémpé lo:dísém mé:la du:la mé:po mé:podé okkasong kinsukumangaboi.Bí Pírik asin mé:ngkampé mé:la mé:ngkaksula dungngai.Mé:la mé:pinsula okoko iyan?okolo gímílo ame:né tame:ko pa:yan émna mé:lango: du:dungai.Émdaggom bí íngkokosin mé:bek-sutomang.

Longé kolo bí édémpé mé:la du:dom Píag adorko ka:pa:suto.Odo bí mé:ngkang.Píag bímai aidun.Bíkké tame:dé ko:tu:ngau:dak.Bégímpé dé:la:dag.Amme:sin Píag mé kirug rukmang.Ngok kangkaní:si ngokké sinané.Ngom tonnésin bojeko dung.

 Píag bí sin longékolo bím amme: lure:- luse:namém mé:re: sula aíé aipé mé:dírra asin asinbokki lusukang- “amo:sok appíngémyang ka:nyi:ng ka:sodopé ru:né bísin ngom isimpé ru:pa:mangai. Yakaloksin yakké , ngom-yang yaka-ya:né amo:so kamang.To:de:mé ru:néí:dé ngomsin ru:tak.Émpige:la ngonyim kapé ru:pansuto:n?”édémpé mé:la du:dom To:de:dé bíkké anín do:pé dé:nga:to.Odo píagdé To:de:mé tauto-“Ajona nok de:míddok asuda:uko bisula:yenéi?Nok tam:dém aipé mé:bo:dak.”Odo To:de dé aipé mé:pokang.To:de:dé luto-“Ajona,Kapila ngokké de:mídém kapila bisuma:yen? bisuye.Nokké tame:dém ngom bilangka.Nokké tame:dém ngo aipé ka:bodag.Ngokké tame:sim nom bipé.”odo Píagbí agomdém tallíksula aipé mé:pokang.Píagbí To:de:ké tame:dém pa:la aipé asé:ngkang.To:de:bí:sin Píakké tamedém pa:la aipé asé:ngkang.Édémpé bínyi: dumsigém olai-mín-suge:la asé:la segong sego:la so:man  bosukang.

To:de:dé Píagdok dumsigém gébom langkula bíkké réngam ara:dopé gía:toku.Píag bísin édémí:pé píag réngam ara:dopé gía:toku.Odo angu To:de: kídardé bím ajon jonsu tokumang.Píag bímsin angu Píag kídardé padubla pato.To:de: mé:té angu To:de: kídardé padubla pato.Píagbí Píakpé itokumang odokké To:de:bísin To:de:pé itokumang.Bínyi:kké dumsígdé angupakkang.Bínyi:kké réngamé katokumang.Ajon- arumé ajon jonsutokumang.Bínyi: odopak mé:su- kangku aidaggom aimanggom aíké opíndém-yang aiyabanmang.Aíké réngamdé réngamko.Amiké réngamdé réngamko.Aíké ané dé anéko.Amiké ané aíké anédémpé édílo:gom ila:mang. Odo bínyi: anyi:dé po:péké dumsigí:dém aiyadag émna olaimín-sutoku.Édé longé dokké binyi: annyi:dé ami:ké gélod-bomlodém mé:bo tokumang.Kadogom kama:dogom aíké gí:dí lé:mo:ém mitpan-supé lagimang émna lubosukang.

Otén nolu kindon? Aíké oné anémé édílogom aiyabanmang.Anéké lubonam agomdé tatpomanggom lupoyasudag.Ami:ké  dírbídé ka:podaggom,anéké bomgabla du:bonam odokké anéké  lé:sibila lé:binam dírbí dírlabdé appíngém aiyabandag.Émpila nolu aíké agom dírbém bomgapsupé aido.Silo sémo: lupo du:bong.Yamponyum lekoda tatponé do:yingko nolum kíboyeku.Nolu lo:dípé naré: napupé du:langka.Naré napula du:mílo kinam ramnamé a:mang.Naré napu:la du:mílo asiné mé:pola du:dag.Iskullo porikapé gílangka,Iskullo porimílo ainé do:yingém kinnadag odokké  bottané tani:pé balladag.Sa,Yampo Adi-Mising ké kapila aíké abígé katoma:ji édém lubipé déi.

Doksiri দকচিৰি, নৱেম্বৰ, ২০২৩