কবিতা কি ?
অংকুৰণ আৰ্ফ
কবিতা -
আঁউসীৰ আন্ধাৰ ফালি আগুৱাই যোৱা জোনাকী
কবিতা -
ধুমুহাত ঢিমিকি ঢিমিকি জ্বলি থকা তুলসী তলৰ চকুৰ চাকি
কবিতা -
জীৱন যাত্ৰাত স্বপ্নময় চিৰিৰে চলা ৰেলগাড়ীৰ উকি
কবিতা -
ফাগুনে সৰাপাতত লিখা
বসন্তৰ চিঠি
কবিতা -
আকাশ স্পৰ্শ কৰাৰ স্পৃহাৰে সাগৰৰ বুকুত নিৰন্তৰ উঠা-নমা কৰি থকা ঢৌবোৰৰ বুকুৰ লিপি
কবিতা -
জীৱন জীৱাশ্মৰ বুৰঞ্জী
কবিতা -
কেঞ্চাৰৰ কীটে কুটি খোৱা মুখৰ ধুনীয়া হাঁহিকবিতা -
ৰাতিৰ আন্ধাৰে শুহি লোৱা আটাইবোৰ ৰ'দৰ দিনলিপিকবিতা -
শূন্যত ওপঙি ফুৰা মায়াবীমাত
সোঁৱৰণি হালধীয়া পাত
হেৰাই যোৱা এখন
সেউজীয়া হাত
কবিতা -
পৃথিৱীৰ আটাইবোৰ মন্দিৰ-মচজিদ-গীৰ্জা-বৌদ্ধ বিহাৰত নিনাদিত পূৰ্ণিমামুখী প্ৰাৰ্থনা
কবিতা -
পৃথিৱীৰ পুৰাতন গুহাবোৰত থকা ভাস্কৰ্যবোৰৰ মুগ্ধ মৌনতা
কবিতা -
সভ্যতাৰ প্ৰথম পুৱাৰ সূৰ্যমুখী
কবিতা-
চৰাইৰ ঠোঁটৰ এচিকুট জীৱনবোধৰ মাটি
কবিতা-
কবিতা চকুপানীৰ চিয়াঁচীৰে লিখা অমৃত অনুভূতি
কবিতা-
জীৰ্ণ হাতখনে নৰ্দমাৰ পৰা তুলি লোৱা এটুকুৰা ৰুটি
কবিতা-
দিনৰ দিনটো বেবাই থকা চাগলী জনীৰ চিঞৰটো
কবিতা সকলো।
সকলো কবিতা।
কবিতা-
পৃথিৱীৰ প্ৰথম ৰাতিপুৱাটোৰ পৰা সৰ্বশেষ সন্ধ্যাটোলৈকে বাজি থকা জীৱন জগত জ্যোৰ্তিময় কৰা
সূৰ্যৰ বুকুত কটা সনাতন সংগীত।
Doksiri দকচিৰি, ডিচেম্বৰ, ২০২৩
No comments:
Post a Comment