KOLE:JLO TAMBORKÉ KANGKIN KÉBANG BA:BONAM

KOLE:JLO TAMBORKÉ KANGKIN KÉBANG BA:BONAM

Bhaigeswar Pogag

     I:té po:loé,Kole:j kídarlo anu ko: ko:néng kídaré anu anupé aminémém alligla kole:jém gírobdubong.Reging pésola akké kole:j gímapé dung.Kole:j do kangkin kébang yamríksuma: takamé reging modag émna ake ko: ko:néng kídardé kole:j gípé pésola dung.Akké collage kangkin kébang légapé murkong urkumdung.Dítag  takamém kangkin kébang Ba:namdé kole:j takamké gerpéru:nam agerko émna poriné ko: ko:néng kídaré mé:sudag.Kangkin kébang ba:rongém takamé ajon jonna klassém idakku.Lakhimpur kole:j dok kangkin kébangém ba:tobo.Taon Mising kangkion kébadém angu dítak kísapé sinnyingsin ba:pé émna ru:sadung.Tamborbí édé kéba:dok nongkumsunépé agerém pa:la yu:mé ro:pé duktíla yepénampé idung.Oyém bímté ka:ríksukuma:namé bojeko ikabo.Ríksukolo gípé gípé émna mé:lalango: du:nampé idung.Abí:ng buluké lunamko dung-Éki: lokké agerésin kamang,Homoyésin kamang.Idaggom duglango: gídag.Édémípé Tamborbí:sin aíém mé:sula lugosudung.Oyém bí ríksuma:la asin asinki aimapé mé:du:opébong.Pa:siga:ttokké togdokudokké ayiréméi pa:lama:pé idung.Réngam agerém mépésin mégumang.Gertogom aíké légapé ayirko pangkumang.No ngo régam agerdém germa:mílo se:ko gerbiyén.Régam émnarung anguko kamang.No,ngo appíngé lenmílopag régamko idag.Émpila Tamborbí appíngém duggo duggola nomkumsudag.Léko Bantupé,léko Setiyapara pé,Léko sabotipé,léko Nokaripé duggotíla du:padag.Kangkin kébangdém ima:takamém taondok sumken sumkenlo:pé duktínampé idung.Oyémbí ajon kídardém lulígdung.Ango Tambormé longkoném ka:ríksulangka émna lulígdung.Sinnying kídar Lokhimpur sim mé:la gíkupé iye.Sinying Oyémbí poringab-yebo.Bí Tambormé mépagla du:namdém bottané ngasotpé mé:sudung.Du:dago:so lo:dípé ka:lango du:lídag.Mo:tépé du:pansukumílo asinété mo:té:la gípéké émna bí mé:dag.Oyémbí “Kangkin” lusardok légapé mé:tomko attung.Mé:tomdém porila tadmopé émna Tambormé gogdung.Mé:tomdém porila ka:nggela: lékoda gompir kídardém moyinsudungku.Yapimété porila tadmodung.Mé:tomdém bí Mising agomki attung.Bí sinyingké kangkin kéba:so po:nungko nu:líkpé émna kole:j dok porinjon ko:néng kídardém goksula po:nungko nu:yirsulasin lé:tung.T.D.C last Year do porila du:né ko:néng kídardém bíkké po:nung ope:do la:tung. Dírbí yu:médo so:pé émna bulu so:yirsula dung.Édé agomdém Tambormé lubipé mé:la dung.Émpigela ka:ríksulamapé ila lulama:pila dung.Ajon kídardé:gom so:ngkíma:namko so:pa:ye émna mé:podung.Bí Adi: réngamké yelod daglod odokké Adi: Misinglok légí légang do:yingémté lubidung.Mipag ajon kídardé Adi lang Mising ko: ko:néng kídardé kapé érang attél tani: kísapé luposuladang émna tau dung.Édémpé luposula du:dom Tamborbí ajonékké gíjonsula Oyémké bording do:pé gíadung.Oyémbí aglíla ka:mane kísapé béryotkang.Ajon klídardé kaje so: so: du:potok émna plastic masuwang (soki) kídardém bulum bito.Oyém ké bordi:do:pé pensam pensamlo gíla ajon kídardé:gom kangkindag.Oyém asutko agom luma:pé dunggela.Taukang-“oko légapé gídungan?Tani:yé yokpé yokpagla du:ladag ai.”Aglí:la lunamdém tatkinna Tamborbí alí:dém jinna jinna lukang-“Gítokpé gítokpé émna mé:la du:dom tokmo:mapila dung.Réngam agerém mé:pésin mégumang.Ngoluwéi daglenbomamílo sé:ko daglenbon émna duggo du:wém aíké bojekoi ageré du:pagdag.”Réngam légapé adí pa:ladag.Ngok légapé adí asutkosinei la:lenla:man?Aglí:la  luto.Ara:pé gía langkula ajon kídardém asi gilas asakko píbom bitungku.Ajon kídardé asidém asé:danna la:ríksudung.Oyémbí aipé kangkanné miyumko.Oyémbí ajon appídém kangkinsuto.Asin do:yidém lubisuto.Ajon kídardé Tamborképé ila kema:pé lubito.Oyémbí mé:yinsuto.Odokké buluké bordingdok ajon kídaré kangkin kéba:so po:nung nu:ye émna lubisuto.Mé:tom akosin “kangkin” émnam lusardok légapé alla lé:tung.Édé mé:tomdémgom Tambormé bito.Bulu appídé ainé agomé émna mé:po dung.Nokké po:nung ope:dém nu:pongar moye émna ajon kídardé togésuto.Oyémké ajon kídardémté Oyémbí yame: kídardém kangkinsuboto.Kangkin kéba:so takamé gílangka émna kangkin kéba:dok ager tarungkané do:jik abor asakko bito.Oyémbí angong kídara du:potola,ngo sa:ngko kirpongkupé dei.Ajon kídardé lukang-“Oyém bírmé, no mibo yame: kídardém luposula du:bopotoka.Ngolu sang kirbipé.Ngolu du:dakso ngoluna sa:ngém kirbiyené.”Mibo yame: kídardé:té ngoluké ra:binam sa:ngém tí:nggela asin otíla du:yekupé.Mímbír kídardém kanggela ko: kídardé:gom luman dung.Bulu do:ying kíla kíla yirkamínsudung.Aropé kole:jlo yenam kísané longé édílo:gom pa:langkuma:ye.Sémpiné longé lékoda gílatkumaye.Ngoluké sí:ta sí:masim sí:tidla gí:tídung.Gíné ayir kídardém bérkutsula ka:yekumílo kablí:dakku.Do:ying kíla du:dom sa:ngété lenkang.Miyum kídardé mibo yame: kídardém sa:ng bídung.Tambor bí bombinam biskudí:dok tí:takpé bidung.Tamborbí lukang-“Oyém angong,ngom aima:pé mí:mapéka.Ngo ager bojela kangangko:lo a:langkumapé ito.Aiye,nokké po:nung ope:dém kangkin kéba:dolo nu:bolanmgka.Ngoluké aying amo:solo Adi: po:nung nu:namém kangkímang.No nu:bopémílo takamé aipé asé:ye.”Bulu agomdém lugela gíkupébong émna lutérsuto.Oyém bí:lang ajon kídardé mibo yame: kídardém lamtédo:pé gílenlíktoku.Oyémbím bording ajon kídardé ngedmandung.Oyémbí aipé asé:dung.Bulu yame: kídardok gíkurdakku me:lamdo po:nungém nu:yir sudung.Oyémbí Mirí anépé idung.Yoksadém bí kíríng kíríng émna dandung.Miri gokla gokla yoksadém ta:lépé lé:sala po:nung a:bang modung.Ajon kídardé a:ba:dém tolígbomdung.Réyém réyémpé po:nung nu:dung.Oyémbí do:lulo du:dom po:nung mirí anépé ila po:nung nu:bodungai.Silo mélo mibo amo:lo du:langkula  mitpan-sudungkubo.Ra:sélok Mírí ané kísapé yebo dungai.Do:lung yelod daglodém supaggom mitpansumang.Do:lung sangkumílo ajon arum kídaré bím po:nung nu:borudag.Gí:dí notkolo po:nungém nu:bola bí bojeko amaném pa:dungai.Angong ajon kídaré émpila bí pa:sigat  sangkumílloi buluké lottado dugbi:sula dagdag.Do:ludok mimélok poriponé émna takamé bím aipé luyumsudag.Miné mí:jíng kídardé bíkké luyirbonamdém tallíksudag.Su,ané abu kídarété mime ommangém poraipé lagidag émnamdém mé:ngkisudung.Su buluké do:ludok mimé ko: kídarém porikolo:pé mílígdag.Akon akon do:lulo supaksin mimé kídarém porikapé mílígmang.Oyémbí do:lung gíkumílo ame: ame:né ko: ko:néng kídardém gokkumsula dé:long po:nung nu:bodag.Émpila bím do:lung bírmé émna gogdag.Bí do:ludok ko: ko:néng kídardém pogo potin do:yingém tatpo tatpopé lubodag.Pogo potin porimílo tani:yé kapé ainé bélamém kangkindagji édé agom kídardém bí do:yi:pé kíbodag.Émpila bí do:lung a:ngkumílloi pori bírm bí a:dungku émna dukkum-sudungku.Do:lung bírmé a:dakku émna dukkum-sudagkku.

Kangkin kébadok légapé po:nungém nu:yirsunam agerém nu:yinto.Supag bulu appídé kangkin kébapé gípé émna lendung.Asindé édílo gípéiké édílo gípéiké émna idung.Ajon gídardém nu:ngkumsugela lérékpé lenbodung.Takamdé Adi galug,Gale,dogné dadok,Sondorng,No:g odokké Du:dabém géru:sudung.Kangkin kébado so:líkru:pé émna bí édé attar kídardém okumdokké togdokudodém bomtungakui.Dogné kídardém Mising ajon kídarém do:lulok makumdopé lulíkla bulu bomtungku.Bí édé dogné kídardém Mising ajon kídardok pa:dope ka:la mé:po dung.Mising tani: kídarsi aying amo:lo yedogom agíké dogné kídarsimé bomsi:la du:dung.Adi:lo dognési bottaru:né amanko.Mising kídaré silo mélo édém bulum arré kané attarpé mé:ngkumang.Sékkai sékkaiké éra:lo du:dom asin ola mési:mang.Po:pé do:ling uyuko moyemílo dogné tumulla yallom gogdakku.Tani:yé siyemílo ma:bí génédém dognéko tumullígdoku.Ale algém pajok paroksumílogom dokní:ko tulígdo.Dogné kandém mirémé émna mé:dungai.Silo mélo murkong kané,Pori unila sakori kanédémpag mirémé émdung.Kéra:lo asi amo:ng kala,a:m kumsung kala,Rémku arém kala odokké dogné kaném migomé émdungai.Silo méloké longsi tu:latkang émna ajon kídardé lugela yirka:mínsula dung.Síképé yirman so:manla du:mílo ngolum kangkin kéba:télo sé:koté kangkinsumaye.Kaju,gílaboju émna Oyémbí lenbodung.Réyémpé gale géla gínamdém ami: kídaré ka:dung.Édílo:sin gale génném kangkíma:la tani: kídardé Oyém bulum ka:dung.Bulu jila potin kumsudo:pé gí:pídolo kangkinsunam ager tarungém irobdu:bo.Buluté gíala me:lamké tetkodo dungkang.Tamborbí ro:dokkébo ka:la ka:la amigé kigosukabo.Ajon kídardé bím luyosudung.Nokké gene po:pídé:son supaglo:pé déngama:dan.Tambor agom luma:pé aso:pé ludag-“Gídopéyém!”Takamé aí aíké tetkodokké kangkin sudung.Oyém bí:té kangkinsupé émna gé:robdung.Bím kangge:la takamé yapako pilígdung.Oyémbí asé: sung.Oyémbí ka:pango:langkula Tamborké dongkal sinnémpiné asindé anupé punnenkuné appun kísapé ikangku.Kangkin kébado oi: ni:tom, anu ni:tom,kaban,mibu a:bang,Léréli so:man,Gumrag odokké atí atí ager tarungé dung.Mé:tom ponam,moimang jigla bérkí berpag ager tarungém ro:dokkébo ila dung.Akke tarungém Oyémbulu gípíla:tomang.Gumrag so:nam ra:da hengkordé maikki lu:padung.Réngama,ngolu édílo:sin kangkíma:nam leke so:namko kangkílai.Ngolu aso: maso:pé aku yelod daglodém odokké gélod daglodém mitpansula gídung.Anu anu yelod daglodém yebomdung.Longékolo sé amo:so ngoluké gélod bomlod kídarsé yokpag-yépé émna pésoko kadung.Supag kaje Adi: miyum mimé Oyémké nu:bonam po:nungko kangkílai.Kaje,Mimé Oyém Talo no okolai du:ji so:pé gí:sala nokké “Mo:ying ra:séng” po:nung ope:dé po:nungém nu:biteika émna goglígdung.Oyémké amindém talla takamé jé:lígna yapako pilígdung.Sékai dumpi mullígdung.Tamborbí aipé asé: dung.Oyém bí gísa:la po:nungém nu:robo:ma:pé ajon kídardém kangkinsuboto.“Ngok amíné mimé Oyém Talo,ngo Lokhimpur General collage lo poridung.Ngokké do:lungé Mirém do:lung, Pa:sigat tokké.So: ngo B.A last year lo porila dung.Sinnying ngo pongab-yebo.Siloké Kangkin kéba:si ngokképé kangkinsutéré.Déképé ila silo ngo Po:nungko nu:líkpé émla ngok ajon kídarsimé a:botung.Nu:mém imémko ka:padokom takamé mí:yin ka:yinsubilangka.Séké kangkin kéba:solo ngo po:nungko nu:pala ngo a:pé bottanapé mí:sudung.”Oyémké agom lunamdém talla takamé tatpopé taddung.Akke Adi:dé kapé Mising agom lukinkan émna luka:mínsudung.Adi agom dé:lang Mising agomdé akamo:dag.Adi-Misingé abu atérlokké lenné émna akon akon luka:mínsudung.Oyém bí po:nungém nu:dung.Régamé Oyémké po:nungém ka:lítíkang.Bíkké yoksa lé:sala kíríng kíríng émna dannamdé sí:sané yame: asin kídardém dan-yugdu:némpé ikang.Po:nung a:bang nu:namdé appun amílo tangudé punlang ma:la dé:ngadu:némpé ikang.Bumurangé appun alangém mu:yuknam kísapé Sí:sané yame: kídardok asiném ro:yugnam kísapé ro:yugbomkang.Yame: kídaré bomka:bo bomka:bo Adi: mimyumé Mising yame: asiném bomka:bo émna jé:lígdung.Oyémké bédu: bé:lé:ngéng ka:la yame kídardé ka:líksudung.Tamborbí lo:dísém so:bo ka:sing kamampé ka:si:bomna lé:tung.Mibo amo:so du:dogom Oyémbí aíké okumlo du:né kísapé mí:sudag.Tambormé aíké obosunam bíro kísapé ka:si mosi:nam légapé asutkosin mé:dírmang.Oyémké émpéi obosunam bírro kamang.Bíro ayangko pangkímang.Tamborké ayangém pa:la bí aipé mé:podag.

Longékolo Tamborké do:lupé gímínkupé mé:dag.Lamté mo:té Tamborbí gíbokumang.Porikang bingabdan-ge:la gíboyeku émna Oyémmé lutung.Kangkin kéba:do Oyémké po:nung nu:namdém takamé luyumsula angu ko:néng kídaré bím nésudung.Yumé ro:pé asin dígla kangkin kéba:sém ba:ledboto.Supag ngoluké aminé okkosin katomang.Édé Adi ko:néngo:dokké kéba:pé ipakkang émna lugé gédung.Édémpé lunamém talla Kabbibí lukang-“ngolugom bíkké kísapé asiné ansi:mílo,bíkkémpé ardamílo ngoluté longékolo bíkkémí:pé ilaye.Ammem néma:pé ngolugom kapila bíkkédémpé ilama:yen émna togabmílo kapila ilama:yen?Sé mo:píso tani:lokké ilama:nam ageréi kamang.Asin mé:ngala imílo appíngém iladag.Do:nyi:yé akkongko,Po:loé akkongko,bíkké légapé Do:nyi-Po:lo anguko kamang.Tani:sigom akkongko.Bíkkété ale-alag kadak ngoluké ale alag kadag.Kapila ngolugom asin rémakla,ayang abo: bikinma:yen?Kapila ngolugom ardapé ager gerkinma:yen?Tani: amo:so tani:yé ayang kamínsupé lagiye.Ngoluké turanamsi longélok lo:tungko.Ngerég annélok assé.Édílo kapé kélletpak-yesong sé:koté lu:lasumang.Émpila lo:nyi:yo:ko turra du:dosém akoné akoném aya:mínsula du:pé lagidag.Sé tani: yenamsé édílo pa:lad-yekun?Taléng amo:ngko,uyu amo:ngko émna angupé kamang.Ainé agerko germílo so:íng taléng amo:ngé dokké aimané agerko germílo so:íng uyu amo:ngém pa:ye.”Bíkké agomdém talla ajon kídardé aso:pé dungkang.Oyémké “Mo:ying Ra:séng” po:nung ope: dém kangkin kébang ope:dé toyumna amaném bito.Aman la:dokupé lékoda po:nungém nu:bidokupé goglíktoku.Oyémbí aipé mé:pokang.Mibo amo:so aíém kangkinamdé aipé bottané amanko émna bí mí:sukang.Bíkké asindé lo:dípé dékéné ainé agerém gertíye émna mé:sukang.

Lo:bo po:lo lok punné kowang appuné ésarlo kapé biré birkurra so:dagji édémí:pé bíkké asindé aséngkang.Ager tarungém ingabdag me:lamdo bulu gíkupé idung.Yame: kídardé oyed oyella kangkinsudung.Édém ka:la angu ko:néng kídardé amig dígdung.Oyémbí ka:pégom aipé kangkandag.Migmodégom minné Tumpulugdémpé lí:yom lí:yomdag.Bíkké agom lu:namdé tad-yumdag,dakor danamdégom sité dakor kísadag,bíkké luposunamdé ngullangémpé ti:yumdag.Yame: kídardé ager mépagdan-ge:la bíkké lédulo yabgomínkang.

Ager tarungém ingabge:la takamé aí aíké okumpé gídungku.Oyém buluté bordi:pé gídungku.Tambor lutérsugela gípo:langkuka émdung.Ngo sé attar kídarsém mosing-ge:la yummé ayirdo tokpé émna luto.Odo do:nyiyété owa:pé émna idubo.Kéba: bangkodo ager gerné kídardém mégel sékoté kakumabo.Sí:sang yame:yé annyi-aumkopé ager gerra dag.Odok migurpé ila Tamborbí dag.Tamborbí ager tarung takamdém dag-yi-daksa:la ka:pénampila Oyém bulum asin mé:ngkampé luposula tomang.Mo:télokké gíné minom kídardém dungko dakko ko mobipénampé idung.Tamborbí lékoném mé:dag séddíné taon ara:sok ager gerdopé ngo:wéi Misingén?Akké dígmang koma:pé gígotagla dung.Ngo doma tí:mapé Éki kísapé duggo duggola du:pé idung.Ta:to ya:yo bulu émpila ludungai-“ekoniya bhare kamiar singe”.Do:yi:dé arro.Miku buluké lunamdé ayadmang.Buluké lunam lunamdé silo aro arola gídung.Tamborbí aíém lugosula dag.Kébang ager togésunamsigom bottané ngasotko.Amme ludag-“Raije nikh jukarile noi boi” “Gagorot agor hobo,Kodomot nogor hobo,paroli gosot jahaj bandibo”émna lunam do:yingé dung.Mi:ku buluké Do:ying kídardé ayadmang.Arro,émpigela takamé lérékpé lenmang.Ako akopé yame: kídardé gípitsungapkangku.Bí:té mosing isingabge:la bordi:pé gítoku.Kangkin kébang gíkurongém asin kídardo ronggam ronggam dungku.Okaiko ményok sutonémpé idungku.Kéba: ba:sapé émna idolo ager gerra adíéméi pa:mínsumangai.Akoné akoném ríksudungai.Supak kídar rongampé du:paye.Mímbír yame: kídaré dítak me:lamso:pak édé kéba:dém lékoda ka:payeku émna mé:sudung.Kéba: bangkodo tani: émpé Tamborbí atérongé daktédla dakkang.Atérodé ronggamé émna lusugela bí:té  gílentoku.

Doksiri দকচিৰি, ডিচেম্বৰ, ২০২৩