NGOLU PA:NAM LÉGANGÉ TURNÉ

 

NGOLU PA:NAM LÉGANGÉ TURNÉ

Mrinangka Patir

Bulu lékoda gía:dungku

Ngoluk tukku élang pin-yosém rékakupé

Borta takpo:né ésab kolo éryedlígge:la.

Boma:dung nappa:do mudlangém

Yéga:bomdung bojérungko payegém

Sém nom biyé édém bím biye.

Bulu pin-yo burné

Lunam agomdo appuné pundag

Kémo ru:rubdo loladé laddag

A:né abung assé ongkag karaggédag

Yakan péttangé kampopagdag.

Buluk ti:né ngamné agomdo

Ngoluk asiné jeddung

Broilar répkampé ngolum rébdung

Tolokké bolopé bolokké tolopé

Élé kébangé télé kébangé

Ngoluma:míloiké rongngam pésamé.

Aki:bok kénong tí:língém oggitsuge:la

Enerang mané poludémpé ígong ígo:la

Taddo ngolu migombuluk ni:tomémpiné agomdém.

Sinnyíngké agomsé so:yung pakkom kabnamé

Bírdugé gíbídmíloi rongngam pésamé.

Ngolukkédan bi:pogdanla dung ngasodé

Okolai o:ko pa:yéiji mé:la mala du:né

Ngolu pa:nam légangé turné.

Du:napé okumko dopé ambín aokko

Gépé bompé galug gasorko

Atí attar rénapé ma-murkongko

Pa:pé ngolu sékkai lépo koiyangém ri:pu:pa:dung.

Édém an-geí:la bulu

Do:mum do:réng kangge:la amli: piddung.

Lékoda gía:dungku bulu so:yu pakkompé ila

Tatponé ni:tom tomkakupé

Ngolum asinang omínsukakupé

A:díma:né bírdug kolo.

Bingírlígdung mé:mursumodung

Lu-urlígdung pamínsumodung

Bulu béryi:la ka:la dung ouddendenné okumlokké

Kíbíg kídung sé:ko sék lédulo du:n

Sé:ko sék lédulo gímíndu:n?

Bi:sam síng émné ésapkokki

Ngolum érrumlígdung

Madla mattusula:ma:la ngolu

Buluk lukamdémpéi tadla dung

Kapéné, ngolu pa:nam légangé turné.

Doksiri দকচিৰি, ডিচেম্বৰ, ২০২৩